Ekipa IPG hasai foto hamutuk ho partisipante atividade diseminasaun risku jeolójiku iha edifisiu Administrasaun munisípiu Ainaro, kinta (03/12). Imajen TATOLI/Antónia Gusmão

AINARO, 03 dezembru 2020 (TATOLI)-Institutu Petróleu no Jeolojia (IPG, sigla portugés) realiza atividade diseminasaun risku jeolójiku no ninia implikasaun ba komunidade nia moris loron-loron ba autoridade kompetente sira iha munisípiu Ainaro.

Xefe Divizaun Risku Jeolójiku no Engeñeiru Jeolójiku IPG, Eugênio Soares, hateten bazeia ba dekretu-lei númeru 33/2012, institutu ninia funsaun prinsipál maka halo peskiza, estudu, mapamentu no mós sai armazenamentu ba rekursu naturál hanesan petróleu, gás, minerál, no bee rai okos.

“Papél IPG halo estudu risku jeolójiku hanesan rai halai, inundasaun kosteira, rai nakdoko no mós tsunami. Institutu halo ona atividade iha Ainaro hanesan mapamentu risku ne’ebé identifika hosi aero foto no konsege identifika fatin hirak ne’ebé potensiál ba risku,” Xefe Divizaun ne’e hateten liuhosi diskursu abertura ba atividade, iha salaun enkontru administrasaun munisípiu Ainaro, kinta ne’e.

IPG mós instala ona estasaun rai nakdoko iha suku Soru-kraik, postu administrativu Hatudu Leolima, munisípiu Ainaro, tanba bazeia ba dadus, fatin ne’e potensialidade rai nakdoko maka’as.

Tuir Eugênio Soares, objetivu hosi diseminasaun maka atu hato’o rezultadu prelemináriu IPG iha munisípiu Ainaro ba autoridade kompetente.

Iha fatin hanesan, Sekretária administrasaun munisípiu Ainaro, Guida Judit Mendonça, hateten diseminasaun ne’e realiza tanba serbisu hamutuk entre administrasaun Ainaro ho IPG, ne’ebé antes ne’e halo koordenasaun.

“Haree ba estudu no analiza institutu ne’e, dalaruma iha Ainaro sei iha akonsimentu rai nakdoko, rai halai, anin boot ne’ebé kada tinan sempre iha, tanba ne’e liuhosi oportunidade ne’e komunidade sira bele hatene di’ak liután situasaun. IPG bele fahe informasaun atu aumenta koñesimentu hodi komunidade tau atensaun másimu ba dezastre ne’ebé la espera,” nia esplika.

Xefe Divizaun Risku Jeolójiku no Engeñeiru Jeolójiku IPG, Eugênio Soares, entrega mapa potensiál risku dezastre naturál iha munisípiu Ainaro ba Sekretária Administrasaun Ainaro. Imajen TATOLI/Antónia Gusmão

Reprezentante administradór ne’e konsidera, atividade ne’eoportunu ba entidade sira.

“Diseminasaun ne’e partisipa hosi xefe suku sira, ne’ebé autoridade lokál ninia papél importante tanba hafoin simu informasaun sira ne’e, sira bele transmite tutan ba komunidade atubele tau atensaun ba risku ne’ebé akontese tanba xefe suku sira mak hatene liu fatin ne’ebé mak iha risku,” Guida akresenta.

Nune’e mós, Xefe Suku Mau-olo, postu administrativu Hatubuilico, munisípiu Ainaro, Jeferino Andrade, sente kontente no apresia tebes ho atividade  ne’e.

“Louva tebes tanba bele hato’o informasaun ne’ebé importante no fó vantajen tebes ba ami no informasaun ne’ebé ami hetan ami sei hato’o filafali ba komunidade atu sira bele tau atensaun bainhira mosu udan no anin boot,” Autoridade lokál ne’e dehan.

Komandante Polísia munisípiu Ainaro, Superintendente Xefe Polísia Justino Menezes, nota katak diseminasaun ne’e iha vantajen pozitivu tebes tanba haree ba risku dezastre nia impaktu boot ba komunidade.

“Hosi informasaun ne’ebé fahe liuhosi estudu bele ajuda komunidade atu atensaun no labele hela besik tasi ibun, mota ibun, no mós rai ida ne’ebé bele hamosu dezastre, maibé ninia desvananjen maka hafoin peskijadór IPG sira halo peskiza to’o agora seidauk iha no sira só tau de’it sinál,” Líder seguransa Ainaro ne’e dehan.

Tuir Komandante Polísia ne’e, durante ne’e komunidade halo uma arbiru de’it iha área potensialidade risku, tanba ne’e hosi atividade sosializasaun bele ajuda ona komunidade tau atensaun maka’as liu, nune’e labele hamosu risku ba sira rasik.

Biban ne’e, Xefe Divizaun Eugênio Soares entrega mapa potensiál ba risku inundasaun, rai halai, rai monu ho erosaun kosteira munisípiu Ainaro ba Sekretária Administrasaun Ainaro.

Atividade ne’e partisipa hosi pontu fokál Diresaun Dezastre Naturál munisípiu Ainaro, reprezentante Sekretaria Estadu Protesaun Sivíl (SEPS) liuhosi Servisu Bombeiru, Komandante Polísia munisípiu Ainaro no postu administrativu sira, reprezentante Ministériu Agrikultura no Peska (MAP), Ministériu Obra Públika (MOP), inklui parseiru dezenvolvimentu balun.

Diseminasaun ne’e sei hala’o mós iha munisípiu Manufahi iha loron sesta (04/12).

Jornalista: Antónia Gusmão       

Editora: Julia Chatarina

 

HAKEREK NO HATÁN

Please enter your comment!
Please enter your name here