Polísia liuhosi SIC detein eis prezidente CFP, Liborio Pereira iha Edifísiu MNEC, kuarta(02/12). Imajen Tatoli/Egas Cristovão

DILI, 02 dezembru (TATOLI)-Komandu Polísia Nasionál Timor-Leste (PNTL) liuhosi Servisu Investigasaun Kriminál (SIC), ohin, tuku 9:30 Otl, detein ona eis Prezidente Komisaun Funsaun Públiku (CFP), Liborio Pereira, iha ninia servisu fatin Ministériu Negósiu Estranjeiru no Kooperasaun (MNEC).

SIC hala’o detensaun ne’e ba Liborio Pereira ho baze ba ezekusaun mandadu detensaun primeiru interrogatóriu Tribunál Distritál Dili (TDD) ho NUC0077/17.PGGCC.

Polísia halo detensaun ba eis prezidente CFP, Liborio Pereira iha Edifísiu MNEC, kuarta(02/12). Imajen Tatoli/Egas Cristovão

Liborio Pereira, deskonfia envolve iha kazu krime partisipasaun ekonomia  liuhosi negósiu ne’ebé kontra Kódigu Penál Timor-Leste, artigu 299 kona-ba ninia envolvimentu partisipasaun ekonomia bainhira asume knaar nu’udar Prezidente CFP iha tinan 2017.

Tuir kódigu penál 299 hatete katak, funsionáriu  ne’ebé  tanba razaun  envolve iha partisipasaun ekonómika liuhosi negósiu iha Alínea 1), Funsionáriu ne’ebé tanba razaun hosi ezersísiu kargu públiku, bele intervein iha kontratu ka operasaun ka atividade seluk, no aproveita iha situasaun rasik ka liuhosi manu-ain, hodi hetan vantajen patrimoniál ba nia aan ka ba terseiru, ka hosi kualkér forma seluk, partisipa iha ekonomia ilísita, no ho modu ne’e bele hasusar interese públiku sira ne’ebé nia hala’o, administra, fiskaliza ka realiza, sei kondena ho pena prizaun hosi tinan-ida to’o tinan-haat.

Alínea 2), enkuantu hosi hahalok anteriór halakon Estadu superiór hosi dolar Amerikanu $10.000 ho pena prizaun nian maka hosi tinan-rua (2) to’o tinan-ualu (8).

Durante  detensaun, Liborio Pereira hatudu kolaborasaun di’ak ho parte SIC hodi hala’o esplikasaun ba karta mandadu Tribunál nian. Nune’e ekipa SIC lori aljema (borgol) hodi tau ba suspeitu nia-liman hodi lori sai hosi nia servisu fatin iha MNEC kontinua ba investigasaun kle’an durante oras 72 iha SIC-Komandu Jerál PNTL Dili.

Hafoin remata mandatu nu’udar prezidente CPF, Liborio Pereira kontinua presta nia servisu iha MNEC nu’udar Diretór  Ajente Coopercão Timor-Leste (ACTL) to’o agora.

Asaun detensaun SIC ne’e halo Sekretáriu Jerál Ministériu Negósiu Estranjeiru (MNEK), Jorge Camões preokupa, maibé nia parte konsege hetan esplikasaun hosi parte SIC.

Tuir observasaun Agência Tatoli nota, funsionáriu MNEC sira mezmu hatudu preokupasaun, maibé sira kontinua hala’o nafatin servisu ho normál.

Jornalista   : Eugénio Pereira

Editór        : Francisco Simões

3 KOMENTÁRIU

HAKEREK NO HATÁN

Please enter your comment!
Please enter your name here