Imajen/Media PN.

DILI, 02 dezembru 2020 (TATOLI)—Parlamentu Nasionál (PN), kuarta ne’e aprova ona proposta-lei Orsamentu Jerál Estadu (OJE) ho montante biliaun $1.895 ba tinan 2021 iha faze jeneralidade.

Parlamentu Nasionál halo diskusaun no halo aprovasaun ba proposta-lei no 23/V(3a) kona-ba Orsamentu Jerál Estadu 2021. Proposta-lei ne’e aprova ho rezultadu votasaun a-favór 44, kontra 0 no abstensaun 0. Purtantu bankada deside walk out hosi plenaria Parlamentu Nasional.

“Ho nune’e proposta lei no 23/V(3a) kona-ba Orsamentu Jerál Estadu 2021 aprovadu iha jeneralidade, faze tuir mai sei iha espesialidade iha loron 4 dezembru 2020,” Prezidente Parlamentu Nasionál, Deputadu Aniceto Longuinhos Guterres Lopes, anunsia liuhosi plenária Parlamentu Nasionál, kuarta ne’e.

Proposta OJE 2021 hamutuk biliaun $1.895 komposta hosi saláriu no vensimentu millaun $239,26, bens (sasán) no servisu millaun $421,49, transferénsia públika millaun $669,91, kapitál minór millaun $61,14 no kapitál dezenvolvimentu millaun $503,20.

Hosi montante biliaun $1.895 ne’e koloka ba prioridade sira hanesan bem-estar sosiál, protesaun sosiál no sidadania $645,180,926 (35.9%), investe iha ekonomia no finansa públika nasaun nian $374,622,063 (20.8%).

Nune’e mós mellora konetividade nasionál $546,181,052 (30.4%), konsolidasaun no fortalesimentu ba defeza, seguransa no relasaun externa $158,830,873 (8.8%) no konsolidasaun no fortalesimentu iha área justisa, demokrasia no direitu umanu $72,428,398 (4.0%).

Xefe Bankada FRETILIN, Deputadu Francisco Miranda Branco, hateten durante ne’e Estadu moris ho rejime duodesimál ne’ebé provoka resesaun ekonomia Timor-Leste.

“Governu sira uluk halo Timor-Leste depende makaas ba sasán esportasaun tanba ne’e orsamentu biliaun $1.895 hanesan raan no isin estadu nian hodi hadi’a hikas servisu efikaz no efisiente liu, hodi rezolve joven sira iha merkadu, dezenvolve setór kooperativa no promove dezenvolvimentu sustentável,” Xefe Bankada FRETILIN hateten.

Xefe Bankada FRETILIN ne’e lakoi Timor-Leste depende ba fundu minarai maibé presiza alternativu hodi substitui fundu soberania ne’e.

Bankada FRETILIN husu deputadu sira atu kuda kultura diálogu iha uma fukun Parlamentu Nasionál, tantu opozisaun no bankada Governu nian.

Vise-Xefe Bankada CNRT, Deputadu Patrocínio Fernandes dos Reis, seidauk rekoñese ezisténsia Governu nian tanba loloos ne’e forma Governu foun.

“Bazea ba istória kapasidade ezekusaun mak biliaun $1.2 no biliaun $1.4 la’ós biliaun $1.9. Ho Dotasaun Orsamentu Temporáriu de’it mós foin ezekuta 60%, Governu ida-ne’e hakarak fahe osan ba malu de’it, OJE 2021 aloka osan boot liu iha bens servisu, nusá mak la tau boot liu iha kapitál dezenvolvimentu. Ami sei hola desizaun nonook iha toma desizaun iha OJE 2021,” Xefe Bankada CNRT ne’e hateten.

Bankada CNRT konkorda investe iha setór produtivu sira hanesan agrikultura, turizmu no setór importante sira seluk.

Xefe Bankada PD, Deputadu António da Conceição, apresia tanba orsamentu ne’e mai ho orsamentu kada programa.

“Bankada PD apresia diskursu Primeiru Ministru Taur Ruak nian ne’ebé rekoñese progresu Governu nian, OJE 2021 ne’e sei fó hikas esperansa ba povu hanesan estrada, bee-moos no reforsa hikas ita-nia setór privadu sira,” Xefe Bankada Partidu Demokrátiku ne’e dehan.

Bankada PD husu deputadu sira hotu promove debate, nune’e tenke fó respeita ba líder hotu-hotu. Bankada PD fó hanoin atu orsamentu ida-ne’e responde duni povu ninia nesesidade hanesan eletrisidade nune’e povu hotu sente naroman ba ukun rasik-aan.

Reprezentante Bankada PLP, Deputadu Noé da Silva, apresia ho VIII Governu Konstitusionál ne’ebé konsege orsamentu ida-ne’ebé iha estraordináriu.

“Ne’ebé iha komitmentu aprezenta orsamentu ida-ne’e ho baze orsamentu kada programa hanesan bem-estar sosiál, protesaun sosiál no sidadania, investe iha ekonomia no finansa públika nasaun nian, mellora konetividade nasionál, konsolidasaun no fortalesimentu ba defeza, seguransa no relasaun esterna no konsolidasaun no fortalesimentu iha área justisa, demokrasia no direitu umanu. Ita fiar katak orsamentu ida-ne’e sei liberta povu hosi kiak no mukit,” deklarasaun polítika bankada PLP haktuir.

Xefe Bankada KHUNTO, Deputada Olinda Guterres, espera orsamentu ida-ne’e bele responde problema água no saneamentu.

“Orsamentu ida-ne’e sei hasa’e kresimentu ekonomia, mellora konetividade hanesan kabu sub-marinu ne’ebé sai mós investimentu boot hodi hasa’e mós kresimentu ekonomia,” Xefe Bankada KHUNTO hateten.

Xefe Bankada PUDD, Deputadu António de Sá Benevides, konsidera proposta-lei OJE 2021 prenxe rekezitu legál no konstitusionál.

“Bankada PUDD sei votu a-favór ba orsamentu ida-ne’e,” Xefe Bankada PUDD ne’e haktuir.

Nune’e mós Xefe Bankada Frente-Mudança, Deputada Isabel Freitas Ximenes, husu Governu prioritiza setór saúde, água no saneamentu no kria polítika di’ak ba setór privadu sira.

“Orsamentu ne’ebé ambisiozu iha tempu estraordináriu. Ami hein katak sei implementa ho didi’ak, ami sei fó ami-nia apoia maibé presiza fó priooridade mak problema sira iha setór saúde hodi aumenta alokasaun ba setór saúde, presiza halo kontrolu ba membru Governu hodi implementa programa ho kualidade,” Xefe Bankada Frente-Mudança ne’e dehan. 

Nia husu Governu atu tau atensaun ba água no sanemamentu, liuliu bee-moos ne’ebé komunidade enfrenta tanba durante ne’e problema boot mak bee-moos.

Iha fatin hanesan Xefe Bankada UDT, Deputadu Francisco David Xavier Carlos, apresia ho montante orsamentu ne’ebé Governu propoin maibé orsamentu kada tinan kontinua halo levantamentu hosi fundu minarai.

“Maibé importante mak responde nesesidade povu nian tanba povu mak ohin loron ita harii nasaun ida-ne’e,” Xefe Bankada UDT hateten.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here