Primeiru-Ministru, Taur Matan Ruak, hamutuk ho membru Governu sira defende Proposta OJE 2021 iha debate faze jeneralidade, iha sala plenária. Imajen TATOLI/Egas Cristovão

DILI, 02 dezembru 2020 (TATOLI)—Ministru Finansa, Rui Gomes, otimista Orsamentu Jerál Estadu (OJE) 2021 bele fó impaktu pozitivu ba kreximentu ekonómiku Timor-Leste hosi -4,5% iha tinan 2020, sa’e ba 3,9% iha tinan oin.

“Ho montante Orsamentu Jerál 2021 biliaun $1,8 resin, espera katak kontribuisaun ba kreximentu ekonómiku purvolta 3,3% to’o 3,9%, ida-ne’e hanesan mós ho Orsamentu Jerál 2016 ne’ebé Parlamentu Nasionál aprova ho montante biliaun $1,9-resin, ne’ebé fó  kreximentu ekonómiku 3,4%,” Ministru Finansa hateten iha ámbitu debate loron datoluk Proposta OJE 2021 iha faze jeneralidade, iha sala plenária Parlamentu Nasionál (PN), kuarta ne’e.

Tuir Governante ne’e, kreximentu ekonomia bele sa’e iha 2021 tanba bazeia ba Produtu Internu Brutu (PIB), iha komponente hitu mak fó efeitu ba polítika fiskál iha Timor-Leste.

Komponente dahuluk, maka konsumu privadu ne’ebé iha OJE 2021, espera sei sa’e ba 4% tanba iha rejime duodesimál 2020 halo konsumu privadu tun ba -2,5%.

“Konsumu privadu hanesan komponente importante tebes iha PIB, ne’ebé sa’e ba 4% mak nia kontribuisaun ba PIB sei sa’e ba 3,3% hodi bele rekupera filafali ekonomia família hafoin xoke hosi pandemia COVID-19,” nia esplika.

Aleinde ne’e, ekonomista ne’e nota katak komponente ne’e sei hetan benefísiu tanba despeza ho bens no servisu sei hetan finansiamentu liuhosi osan cash $200 ba kada família no programa Cesta Bázika.

Daruak, Investimentu Privadu ho ninia previzaun hatudu katak iha OJE 2021 ne’e sei iha aumentu 22,1% kompara ho 2020, ne’ebé rejista kreximentu -30,6%.

“Aumentu  ne’e sei mai hosi ativadade konstrusaun privadu no investimentu iha kapitál dezenvolvimentu,” nia hatutan.

Datoluk, hosi parseiru dezenvolvimentu sira, ho previzaun katak sira sei kontribui purvolta 5,7% no iha 2020 kontribuisaun hosi parseiru dezenvolvimentu monu -23,4%.

“Despeza ne’e, espera kontribui ba kompra ekipamentu médiku no halo metigasaun ba impaktu COVID-19,” Ministru akresenta.

Dahaat, konsumu Governu ne’ebé iha orsamentu 2021, ho esperansa katak ho konsumu Governu bele sa’e to’o 1,3% kompara ho 0,4% iha tinan 2020.

“Komponente ne’e sei hetan kontirbuisaun maka’as hosi despeza Governu iha bens no servisu ne’ebé la inklui transférensia ba família sira tuir konta nasionál,” nia realsa.

Dalimak, hosi investimentu públiku, ho previzaun hatudu katak ho OJE 2021 bele sa’e to’o 16,8%, kompara ho rejista kreximentu -31,8% iha 2020, ne’ebé ho aumentu ne’e bele fó kontirbuisaun ba kreximentu PIB bele to’o 2,7%.

Daneen, suportasaun bens no servisu ho previzaun hatudu 3,8% hafoin rejista kreximentu -48,4% iha 2020, ho  esperansa katak produsaun kafé bele sa’e  iha 2021.

Ikus liu, importasaun bens no servisu ho previzaun katak ho orsamentu 2021 sei tulun kreximentu importasaun sa’e ba 7,9%, kompara ho kreximentu -11,5% iha 2020 no iha tinan oin sei akontese nornalizasaun iha kadeia lojístika hafoin metigasaun ba surtu COVID-19.

Ministru Rui Gomes afirma Rekuperasaun Ekonómiku no dezenvolvimentu ekonómiku no sosiál sei la konkretiza bainhira kreximentu ekonómiku laiha.

“kreximentu Ekonómiku sei la akontese enkuantu Produtu Internu Brutu la hetan estímulu liuhosi despeza públika,” nia fó hanoin.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here