Prezidente INCT, Francisco Cornelio Guterres.Imajen/Tome Amado.

DILI, 02 dezembru 2020 (TATOLI)—Institutu Nasionál Siénsia no Teknolojia (INCT-sigla portugés), ohin, realiza kompetisaun hakerek monografia ba estudante finalista hamutuk ema na’in 42 husi Institutu Ensinu Superiór Públiku no Privada (IESPP).

“Ita foti de’it rejultadu husi sira-ninia peskiza ne’ebé mak sira hakerek ona iha monografia, bazeia ba teze finál ne’e mak ita haruka sira halo fali rejumu hodi aprezenta mai INCT atu halo fali selesaun,”dehan Prezidente INCT, Francisco Cornelio Guterres, ba jornalista sira iha salaun Ian Martin INFORDEPE Matadouro, kuarta ne’e

Kriteria husi konkursu ne’e maka haree liliu ba monografia ho valór exelente husi kada partisipante. 

Aleinde ne’e, estrutura monografia, kandidatu sira tenki aprezenta ho programa microsoft power point, komunikasaun no aprenzentasaun no domina materia.

Nia dehan, ekipa avaliadór sira maihosi dosente hamutuk ema na’in 15 husi universidade privada no públiku iha Timor-Leste.

Avaliadíor sira sei fó valór husi 60 no másimu 90 to’o 100. Partisipantes konkursu aprezenta sira-nia teze ne’ebé kobre iha área agrikultura, ekonomia, edukasaun  no seluk tan.

Manán na’in sira sei simu premiu ho osan $600 ba manán na’in dahuluk, daruak sei simu $500 no manán na’in datoluk sei simu $300.

No tuir orariu premiu ne’e rasik sei distribui iha loron 12 fulan-dezembru 2020 iha Dili.

Iha fatin hanesan Sekretáriu Estadu Arte no Kultura (SEAK), Teofillo Caldas, orgullu ba estudante finalista 42 ne’e tanba iha duni kapasidade hodi hakerek monografia ho exelente.

“Ha’u husu bá imi atu sai peskizadór ida di’ak preparadu nakonu ho koñesimentu no abilidade hodi sai estudante ida kualidade iha área peskiza siéntifiku nian,” katak nia.

Entretantu, konkorente 42 ne’e husi UNTL, Kristál, UNDIL, UNITAL, IOB, DIT no IPDC.

Jornalista :Tomé Amado

Editór :Agapito dos Santos

HAKEREK NO HATÁN

Please enter your comment!
Please enter your name here