Data center DNTT iha Caicoli. Imajen/Mídia MTK

DILI, 01 dezembru 2020 (TATOLI)—Dirasaun Nasionál Transporte Terrestre (DNTT) hahú moderniza atendimentu públiku ho instalasaun Land Transport Management Information System (LTMIS).

“Instalasaun sistema dijitál iha DNTT ne’e atu muda atendimentu públiku hosi manuál ba djitál, nune’e hafasil atendimentu públiku”, Xefe Departementu Rejistu Veíkulu, DNTT hosi Ministériu Transporte no Komunikasaun  (MTK), Nelson Sequeira, ba Agência TATOLI via telefónika, tersa ne’e.

Nia haktuir projetu instalasaun sistema baze dadus ne’e hosi kompañia Super Xerox ba DNTT hahú iha 2015 maibé la konsege hotu, tanba halo hela konstrusaun ba edifísiu diresaun ne’e.

Iha 2017, kompañia kontinua serbisu, maibé entrega ba parte MTK, tanba kestaun balun no iha 2019 la konsege entrega, hafoin ohin kompañia entrega ba ministériu.

Tanba ne’e, Ministru Transporte no Komunikasaun, José Agostinho da Silva, ohin inaugura data center DNTT inklui sistema dijitál ne’ebé entrega hosi kompañia.

“Sistema baze dadus ne’e atu halo atendimentu ba públiku tuir sistema modernu liu, no dijitál agora uza iha fronteira, nune’e aplika bainhira karreta tama iha fronteira terrestre Mota-ain, enkuantu iha fronteira Salele tinan oin maka monta”, akresenta.

Sistema dijitál ne’e bele halo ba atendimentu rejistu veíkulu no buat hotu ne’ebé maka ligasaun ho  DNTT hanesan karta kondusaun no inspesaun.

“Kompañia Super Xerox responsabliza ba projetu montajen sistema dijitálizasaun ne’e, ne’ebé antes ne’e fó ona treinamentu ba funsionáriu DNTT oinsá atu uza sistema ne’e ba atendimentu públiku”, nia hatutan.

Tanba ne’e, kompañia konklui ona sistema no entrega ona ba ministériu hodi ba oin DNTT bele uza ona sistema ne’e.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here