Deputada Bankada CNRT. Virgínia Ana Belo. Imajen/Cipriano Colo.

DILI, 01 dezembru 2020 (TATOLI)—Bankada Congresso Nacional da Reconstrução de Timorense (CNRT) konsidera governu nia proposta atu foti millaun $830 liu Rendimentu Sustentável Estimadu (RSE) sei fó ameasa sustentabilidade fundu minarai iha futuru.

Deputada Bankada CNRT, Virgínia Ana Belo, preokupada ho sustentabilidade fiskál, kompara OJE 2020 iha aumenta 27% tanba iha jornada orsamentál Ministériu Finansa propoin senáriu másimu biliaun $1.6 ba 2021.

“Ami la hatene Governu bele mai fali ho biliaun $1.9, kresimentu makaas entaun tenke esesu ba levantamentu mak millaun $829,8 (millaun $830). Ne’e fó ameasa ba sustentabilidade fundu petrolíferu, sei kria defisit fiskál no halo kresimentu orsamentu boot ho proporsaun boot liu 61% ba despeza rekorente,” Deputada Virgínia Ana Belo, levanta liuhosi debate jeneralidade loron daruak, iha plenária Parlamentu Nasionál, tersa ne’e.

Nia haktuir, Prezidente Repúblika Francisco Guterres “Lú Olo” veta OJE 2019 ho montante biliaun $1.6 tanba preokupa ho sustentabilidade fiskál fundu minarai nian.

“Sera que ho orsamentu ida agora ne’e señor Prezidente Repúblika promulga ou la presiza lori tempu naruk hodi estuda, ita hein no ita haree,” deputada Virgínia Ana Belo hateten.

Nia subliña, tinan sira tuir mai mak sei kontinua ho tendénsiu ezekusaun ki’ik no laiha alternativa entaun fundu petrolíferu bele hotu iha 2030.

“Sera que governu ida-ne’e preokupa ho sustentabilidade fiskál ka lae. Ha’u haree Governu uza de’it ba liña orientasaun ba elaborasaun proposta-lei OJE 2020 nian ba 2021 no orsamentu programátika do que kaer ba programa Governu ne’ebé aprova ba tinan lima, ne’ebé CNRT mós inklui iha laran. Maibé, Governu ida-ne’e ami la hatene tanba Governu ida-ne’e laiha programa entaun pergunta mak ne’e, orsamentu ida-ne’e atu finánsia sé nia programa,” nia ejize.

Reseita Fundu Minarai 

Iha livru panorama orsamentál ne’e esplika, fundu minarai kontinua nu’udar fonte finansiamentu prinsipál ba OJE.

Levantamentu fundu minarai halo liuhusi mekanizmu (Rendimentu Sustentável Estimadu (RSE) no esesu levantamentu ne’ebe tenke  utiliza ba interese Timor-Leste nian iha tempu naruk.

Kalkulasaun RSE halo bazeea ba projesaun valór fundu minarai iha inisiu tinan finanseira no valór prezente hosi reseita minarai ne’ebé atu hetan iha futuru. Presupostu sira-ne’ebé uza ba kalkulasaun RSE ba OJE 2021 kuaze hanesan ho OJE 2020 nian, maske retornu investimentu no reseita petrelífera iha 2020 iha mudansa tanba hetan aumentu.

Nunee, prevee katak sei iha aumentu ba balansu fundu minarai no RSE ba 2021 sei sa’e ba millaun $547.9 ka iha aumentu millaun $12.3. Levantamentu fundu minarai ba OJE 2021 hamutuk biliaun $1,377, reprezenta 7.6% rikusoin petrolíferu no esesu levantamentu hamutuk millaun $829.7.

Purtantu to’o iha fulan-setembru, balansu fundu minarai hamutuk biliaun $18,469, retornu investimentu hamutuk millaun $906.5 (5.2%) no reseita petrolíferu hamutuk millaun $290.4 . Prevee katak balansu fundu minarai to’o tinan 2020 nia rohan hamutuk  biliaun $18,065.7.

Maibé balansu ida-ne’e bele muda depende ba dezempeñu investimentu iha merkadu finanseiru no levantamentu hodi finánsia orsamentu estadu iha kuarter ikus tinan 2020 nian.

“Valór fundu minarai prevee sei kontinua tún iha futuru tanba reseita minarai sei kiik kompara ho tinan anteriór nu’udar konsekuénsia hosi produsaun iha kampu Bayu‐Undan ne’ebé tún no retornu investimentu dala ruma la sufisiente ka kiik kompara ho nível levantamentu,” refere livru panorama orsamentál, ne’ebé asina hosi Ministra Finansa Ein-Ezersísiu, Sara Lobo Brites.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here