Prezidente Repúblika, Francisco Guterres ‘Lú Olo’, prezide reuniaun Konsellu Estadu iha Palásiu Prezidensiál, Bairro Pité, Dili, segunda, (30/11). Imajen TATOLI/Egas Cristovão

DILI, 30 novembru 2020 (TATOLI)–Prezidente Repúblika, Francisco Guterres ‘Lú Olo, ohin (30/11/), hahú prezide reuniaun Konsellu Estadu (KE) no Konsellu Superiór Defeza no Seguransa (KSDS) hodi rona hanoin sira kona-ba pedidu Governu ba estensaun Estadu Emerjénsia (EE) ba daualuk.

Tuir ajenda, Prezidente Repúblika prezide reuniaun KSDS, tuku 09:30 no reniaun KE iha tuku 11:00.

Hafoin rona hanoin sira hosi konsellu rua ne’e maka Xefe Estadu sei foti desizaun, maibé molok dekreta EE ba daualuk sei husu autorizasaun hosi Parlamentu Nasionál (PN) hafoin dekreta EE.

Notísia relevante: Governu propoin estende EE ba daualu

Prezidente Repúblika husu autorizasaun PN ba deklarasaun EE hosi dahuluk to’o dahitu ona, ho baze ba pedidu Governu, ho fundamentu hadook ema hotu ne’ebé hela iha Timor-Leste hosi kalamidade públika ne’ebé mosu hosi COVID-19.

Antes ne’e, Primeiru Ministru (PM), Taur Matan Ruak, hateten razaun Governu propoin Prezidente Repúblika halo renovasaun EE daualuk ba loron-30 tanba atu evita COVID-19, maski kazu pozitivu sira rekupera hotu ona maibé atu prevene no taka dala ba pandemia globál ne’e.

PM Taur dehan medida no regra EE daualuk sei nafatin ho aplikasaun ne’ebé iha fleksibilidade no atividade hotu la’o tuir prátika situasaun surtu COVID-19 iha Timor-Leste.

Estensaun EE tanba haree ba mudansa preokupante hosi situasaun epidemilójika no proliferasaun ba kazu rejistadu no kontajiu COVID-19 iha nível rejionál no mós mundiál, atu evita no netraliza risku propagasaun no bele proteje saúde públika no iha kbiit atu hatán ba Sistema Nasionál Saúde.

EE dahitu hahú hosi tuku 00:00 loron 04 novembru 2020 (kuarta) no ramata iha tuku 23:59 loron 03 dezembru 2020 (kinta).

Membru  sira ne’ebé halo parte KSDS, Prezidente Repúblika Francisco Guterres Lú Olo, Primeiru-Ministru no Ministru Interiór Taur Matan Ruak, Ministra Negósiu Estranjeiru no Kooperasaun  Maria Adalzija Magno, Ministru Defeza Filomeno Paixão,  Ministru Justisa Manuel Cárceres, Xefe Estadu Maior Jeneral FALINTIL-Forsa Defeza Timor-Leste (F-FDTL) Lere Anan Timur, Komisáriu Polísia Nasionál Timor-Leste (PNTL) Faustino da Costa no Diretór Jerál Servisu Nasionál Intelijénsia Manuel Serrano. 

Halo mós parte iha Konsellu ne’e,  membru sira nomeadu  hosi PN hanesan, Adérito Hugo da Costa, David Dias Ximenes, Abel Pires da Silva no membru sira nomeadu hosi Prezidente Repúblika  hanesan José Manuel Fernandes ‘Nakfilak’ no Cristina da Silva.

Entretantu, Membru  sira ne’ebé halo parte KE maka hanesan Prezidente Repúblika Francisco Guterres Lú Olo, Eis Prezidente Repúblika no atuál Primeiru-Ministru Jeneral Taur Matan Ruak,  Prezidente Parlamentu Nasionál Aniceto Longuinhos Guterres Lopes.  Halo parte mós Konsellu ne’e  membru sira nomeadu hosi Prezidente Repúblika hanesan  Óscar Lima, Alcino de Araújo Barris, Maria Dadi Soares Magno, Laura Soares Abrantes no Faustino da Costa. 

Reprezentante hosi PN maka hanesan Eduardo de Deus ‘Dusae’, Aurora Ximenes, José Cornélio Guterres, Arcângelo de Jesus Gouveia Leite no José dos Santos ‘Naimori Bucar’.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here