Segundu Komandante Polisia Munisípiu Dili, Superintendente Asistente, Euclides Belo. Imajen Tatoli/Antonio Goncalves

DILI, 30 novembru 2020 (TATOLI)-Komandu Polísia Munisípiu Dili liuhosi Eskuadra Nain Feto, detein ona suspeitu mane-ida ho inisiál JA ne’ebé lori tudik sona mate vítima negosiante Ernesto dos Santos iha área Merkadu Taibesi, Suku Lahane Osidentál, Munisípiu Dili.

Hafoin oho  vítima, suspeitu na’in-rua tenta halai sai hosi area jurizdisaun Dili no parte PNTL halo kedas operasaun flagrante delitu konsege kaptura suspeitu JA iha área Tasi-Tolu, Dili ho evidénsia balun.

Suspeitu-sira lori tudik sona vítima nia hirus matan parte kuana to’o raan fakar sai barak, no polísia konsege kontaktu ambulánsia tula vítima ba to’o Ospitál Nasionál Guido Valadares (HNGV), maibé la konsege salva vítima nia vida.

Vítima hetan ataka hosi suspeitu sira bainhira hala’o hela nia atividade negósiu iha loron 28 novembru, tuku, 00:41 iha área Aituri-Laran.

Segundu Komandante PNTL Munisípiu Dili, Superintendente Euclides Belo dehan, parte PNTL rekolla dadus deskonfia suspeitu-sira hemu lanu tiha maka halo ataka sona mate vítima negosiante ne’ebé orijen hosi Postu Administrativu Remexiu- Aileu.

“Suspeitu na’in rua maka envolve, no suspeitu ida ho inisiál JA ita kaer iha área Terminál Tasi-Tolu, agora detein hela iha sela polísia hodi submete ba investigasaun,” Superintendente, Euclides Belo hateten ba jornalista iha Komandu PNTL, Caicoli, Dili.

Nia dehan, parte PNTL investiga ona suspeitu JA no suspeitu ida fali parte PNTL halo ona identifikasaun ba ninia identidade no hela fatin kompletu no hein mandadu hosi Ministériu Públiku hodi halo detensaun.

Mate isin vítima nian, parte Servisu Investigasaun Kriminál no ospitál Dili halo ona autópsia hodi entrega ba família hodi halo serimónia funerál iha matebian nia moris fatin, Munisípiu Aileu.

Jornalista: Eugénio Pereira

Editór: Francisco Simões

HAKEREK NO HATÁN

Please enter your comment!
Please enter your name here