Prezidente Repúblika, Francisco Guterres 'Lú Olo'. Imajen Tatoli/Egas Cristovão

DILI, 30 novembru 2020 (TATOLI)–Prezidente Repúblika (PR), Francisco Guterres Lú Olo, rekoñese atu labele nega katak, Francisco Xavier do Amaral pertense mós ba pasadu nu’udár figura istórika ida ba Timor-Leste.

Rekoñesimentu ne’e Xefe Estadu hato’o liuhosi mensajen iha lansamentu livru Biografia Francisco Xavier do Amaral ne’ebé eskritór Aniceto Guru Berteni Neves hakerek no fasilita hosi Centro Nacional Chega (CNC) iha Salaun Konferénsia Antigu Komarka, Balide, Dili, segunda ne’e.

Iha mensajen ne’e, Prezidente Repúblika hato’o dala barak katak timoroan hotu nu’udár sidadaun, tenke estuda no buka hatene kona-ba pasadu no kona-ba Istória.

“Ha’u sempre defende katak, koñesimentu kle’an no lolós kona-ba ita-nia pasadu sei iha impaktu diak ida ba ita-nia atitude no hahalok ohin-lorón-nian no liuliu sei loke ita-nia néon hodi hateke ba lóron aban-bainrua-nian,” Xefe Estadu hateten liuhosi komunikadu imprensa ne’ebé Agência TATOLI asesu, segunda ne’e.

Aman nasaun ne’e hatutan, timoroan hotu iha dever hodi preokupa ho timoroan nia pasadu rasik hodi bele dignifika patrimóniu estraordináriu ne’ebé beiala sira husik hela ba timoroan, liuliu akadémiku sira.

Prezidente Repúblika fiar katak, Universidade mak fatin lolós hodi halibur hanoin ho mentalidade krítika hodi dezenvolve kapasidade atu buka koñesementu no atu halo investigasaun.

Imajen/Media PR.

“Iha prosesu ida-ne’e, atu buka hatene ita-nia pasadu, ita tenke estuda kle’an ita-nia figura istórika sira. Feto no Mane sira ne’ebé, ho dalan oioin, kontribui no influensia ita-nia kondisaun ohin-lorón-nian. Ita labele nega katak Francisco Xavier do Amaral pertense mós ba pasadu ida-ne’e nu’udár figura istórika ida. Traballu ida-ne’ebé ohin ita halo lansamentu ba hanesan parte ida hosi prosesu ida-ne’e, hodi buka koñese ita-nia Istória,” Xefe estadu subliña.

PR Lú Olo subliña tan katak, importante tebes, bainhira atu trata informasaun ne’ebé iha, liuhosi sasin ruma ka depoimentu ruma katak tuir prinsípiu rigór no lia-loos kona ba faktu sira.

“Ha’u hein katak traballu ne’ebé ita lansa daudaun, bainhira ita hahu lee no estuda, bele loke dalan ba diskusaun no debate kle’an hodi kontribui atu hadi’a no diversifika abordajen no tratamentu ne’ebé ita tenke halo kona-ba periúdu ida ne’ebé susar tebes hosi ita-nia Istória,” PR Lú Olo hateten.

Nia mensiona katak, ohin-lóron ema sei iha tempu barak liu, sasin sira ne’ebé sei moris no mai ho kontribuisaun oi-oin, rekursu no meiu diak liu atu hatene kle’an liu tan kona-ba faktus ka eventu ruma.

Autór sira mak tenke hatene uza rekursu sira ne’e hotu, no informasaun ne’ebé mai hosi sasain sira, ho rigór sientífiku ba produsaun koñesimentu.

“Ita iha kondisaun atu rona malu maibé ita tenke iha umildade, espíritu nakloke no respeitu ba malu. Hatene rona, hanesan arte ida no atu hatene Istória lori tempu,” nia hateten.

Prezidente Repúblika agredese barak ba Centro Nacional Chega! Tanba esforsu ne’ebé halo hodi kontribui ba peskiza no investigasaun istórika hosi País ne’e.

Ho eventu ohin-nian, Xefe estadu konsidera katak, Timor-Leste hakat pasu ida tán kona-ba figura inkontornável ida hosi Istória Timor nian no Xefe estadu hein katak, traballu ida-ne’e sei fó estímulu no loke dalan ba debate, reflesaun no peskiza.

Jornalista: Cipriano Colo

Editór: Cancio Ximenes

HAKEREK NO HATÁN

Please enter your comment!
Please enter your name here