Prezidente Repúblika, Francisco Giterres Lú Olo, halo pasa-revista ba formatura forsa militár no polísia iha Komemorasaun Loron Proklamasaun Independénsia RDTL ba dala-45, iha Munisípiu Liquiçá, sábadu (28/11/2020). Imajen Tatoli/Egas Cristovão

LIQUIÇÁ, 28 novembru 2020 (TATOLI)–Iha ámbitu selebrasaun loron Proklamasaun Independénsia Timor-Leste ba 45 iha Munisípiu Liquiçá, Prezidente Repúblika, Francisco Guterres Lú Olo afirma katak Estadu Timor-Leste (TL) tenke aposta liután ba parte edukasaun no saúde.

“Ita hotu fó liman ba malu, militante partidu ka lae, feto no mane, atu ita ajuda Governu rekoopera lalais ekonómia no hasa’e kresimentu ekonómiku. Nune’e, ita prepara futuru ida di’akliu ba ita-nia oan no beioan sira atu sira hetan duni futuru ne’ebé di’ak. Tanba ne’e, Estadu Timor-Leste tenke aposta liután iha sira-nia edukasaun no saúde atu sira bele sai produtivu liután,” Xefe Estadu hateten iha sábadu ne’e.

Ho kestaun ne’e, PR Lú Olo hato’o ba parte saúde públika tenke viabiliza hosi Estadu no regula husi asaun Estadu nian liuhosi Ministériu Saúde (MS). Importante implementa polítika saúde públika di’ak atu ema hotu-hotu moris ho saudável hodi garante ba ema-nia partisipasaun iha planu rekooperasaun ekonómika no kreximentu ekonómiku.

“Ita tenke investe liután no atu di’akliu iha setór produtivu ekonómia nasionál nian. Rekooperasaun ekonómia nasionál sei hahú iha tinan finanseiru foun no ita tenke muda mós ita-nia hanoin, hahalok no serbisu atubele konsege ekonómia ida ne’ebé reziliénte, inkluzivu no hatuur ho koñesimentu,” Lú Olo tenik.

PR Lú Olo fó parabéns ba Komisaun Organizadora ne’ebé eskolla tema “Hamutuk ita garante saúde públika iha kontestu rekooperasaun ekonómia nasionál” tanba tema ne’e fanun ukun-na’in sira.

“Parabéns ba Komisaun Organizadora tanba hili ona tema importante ida-ne’ebé bele fanun ukun-na’in sira no sosiedade tomak iha loron Proklamasaun Independénsia ba dala-45. Timor-Leste tenke harii Servisu Nasionál Saúde ne’ebé preparadu atu prevene moras ne’ebé de’it no halo tratamentu lalais ba ema moras, iha tempu ne’ebé de’it,” Xefe Estadu informa.

Lú Olo salienta katak atu iha médiku no pesoál tékniku ba servisu espesializadu, ekipamentu no meiu diagnóstiku natón no jestór di’ak ba servisus saúde iha momentu hotu-hotu para haburas prestasaun servisu saúde exelente ida iha rai doben TL no tau-matan ba ema hotu-hotu.

Jornalista: Osória Marques
Editór: Xisto Freitas

HAKEREK NO HATÁN

Please enter your comment!
Please enter your name here