Vise-MEJD, António Guterres partisipa serimónia graduasaun ba estudante finalista iha Ensinu Pré-Eskolár Hendricus Leven Bairru-Pité, Dili, foin lalais ne’e. Imajen Tatoli/Tomé Amado.

DILI, 27 novembru 2020 (TATOLI)—Vise Ministru Edukasaun Juventude no Desportu, António Guterres, iha sesta ne’e fó graduasaun ba estudante finalista hamutuk ema na’in 70 husi Eskola Ensinu Pre-Eskolár Hendricus Leven Bairru-Pité Dili.

Dezenvolvimentu rekursu umanu hahú kedas husi ensinu pre-eskolár, tanba ne’e, Governante apresia ba madre sira ne’ebe maka  halibur an iha Fundasaun Santo Hendricus Leven hodi kontribui ba dezenvolvimentu iha área edukasaun.

“Ha’u agradese ba madre no inan-aman sira tanba bele apoiu malu ona hodi hari’i eskola ba labarik sira,  ida ne’e prosesu diak ida hodi prepara ita-nia oan sira ba edukasaun tuir mai,” dehan nia iah serimonia graduasaun ohin.

Iha fatin hanesan Diretora Pre-Eskolár Hendricus Leven, Me. Lucia Expostu, hateten antes ne’e, labarik hamutuk ema na’in 100 maka eskola iha fatin ne’eba maibé estudante na’in 30 la kontinua sira-nia estudu durante akontesimentu kazu pandemia globál COVID-19.

“Atu sai profesór ka profesora ba labarik sira iha jardin infantíl ka ensinu pre-eskolár presiza pasiénsia tanba atu eduka labarik sira ho idade ne’ebé sei nurak la fasil dala ruma tanis mós mataben la sai. Maibe esforsu no pasensia hotu ohin bele ultrapasa serimonia graduasaun ida ne’e ho di’ak tebes,” nia informa.

Jornalista : Tomé Amado

Editór:Agapito dos Santos

HAKEREK NO HATÁN

Please enter your comment!
Please enter your name here