Ró Haksolok. Imajen/Dok. ZEESM

DILI, 26 novembru 2020 (TATOLI)—Primeiru-Ministru (PM), Taur Matan Ruak, hateten Governu labele deside hasai rúbrika iha Fundu Espesiál Dezenvolvimentu (FED) ho montante millaun $14 hodi finaliza konstrusaun Ró Haksolok.

Verba ne’e propoin hosi Autoridade Rejiaun Administrativa  Espesiál Oé-cusse Ambeno (RAEOA) no Zona Espesiál Ekonomia Sosiál Merkadu, Timor-Leste (ZEESM,TL).

“Ha’u hanoin diskusaun ne’e sei halo iha Parlamentu Nasionál (PN), ne’ebé só sira maka bele deside katak osan ne’e kontinua ka hasai,” Xefe Governu afirma hafoin halo enkontru semanál ho Xefe Estadu iha Pálasiu Prezidensiál, Bairro Pité, kinta ne’e.

Rejiaun RAEOA-ZEESM, propoin millaun $127 iha Orsamentu Jerál Estadu (OJE) 2021 ba despeza globál rejiaun ne’e, inklui millaun $14 hodi finaliza konstrusaun Ró Haksolok (livru 3C orsamentu).

Notísia Relevante: RAEOA propoin millaun $127 inklui millaun $14 finaliza Ró Haksolok

“Autoridade hanoin katak presiza osan ne’e atu kontinua prosesu konstrusaun ró, tanba atu  la’o ba oin tenke tau osan, maibé agora ba iha Parlamentu Nasionál mak deside, até la’ós membru Governu mak deside tanba RAEOA iha outonomia finanseira,” PM Taur akresenta.

Bazea ba livru 3C, iha tinan 2021 previstu iha millaun $127 koloka ba saláriu no vensimentu $11.072.049, bens  no servisu $23.775.569, kapitál menór $2.360.470, kapitál dezenvolvimentu $85.506.102, no transferénsia públika $4.285.810.

Ró Haksolok ho kustu millaun €13,7, inaugura iha loron 26 maiu 2017 iha sidade Figuerra da Foz, Portugál no tuir informasaun sei to’o iha outubru 2017, maibé tanba problema internál ba kapasidade finanseira kompaña Atlantic Eagle ship Building, ne’ebé hanesan responsável ba konstrusaun no sub-kontratór maka to’o agora ró seidauk to’o Timor-Leste.

Enkuantu, prosesu konstrusaun Ró Haksolok ninia kontratu asina iha 2014 entre Governu no empreza portugés.

Kontrusaun ró ne’e konsege paradu maibé bainhira estabelese ZEESM, prosesu konstrusaun ró-ahi ne’e entrega ba Autoridade RAEOA maka responsabiliza.

Autoridade simu prosesu konstrusaun ró liuhosi transferénsia projetu no alokasaun orsamentu hosi Governu sentrál ba Autoridade hodi transfere poder no alokasaun verba ne’ebé akontese entre Governu no Estaleiru Atlantic Eagle ship Building.

Atu garante implementasaun tuir espesifikasaun no padraun tékniku ba Ferry Ró Haksolok no assegura katak ró ne’e bele hetan rejistu internasionál, tuir rekezitu Governu Timor-Leste, maka RAEOA-ZEESM selebra kontratu supervizaun ba konstrusaun ferry ho instituto soldadura e Qualidade (ISQ) ne’ebé hanesan instituisaun ho esperiénsia liu tinan 50 ho konstrusaun ne’ebé kredénsial atu fiskaliza konstrusaun.

 Ró ne’e rasik iha kapasidade atu tula ema na’in-377 no karreta hamutuk 15.

 Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here