Ministru Turizmu, Komérsiu no Indústria, José Lucas do Carmo da Silva, hamutuk ho Diretór Ezekutivu BNCTL, Brígido de Sousa, selebra akordu, iha edifísiu MTKI, Mandarin, kinta (26/11). Imajen TATOLI/Egas Cristovão

DILI, 26 novembru 2020 (TATOLI)–Ministériu Turizmu, Komérsiu no Indústria (MTKI) liuhosi Diresaun Inspesaun Jerál Jogu, selebra akordu ho Banku Nasionál Komérsiu Timor-Leste (BNCTL, sigla portugés) atu garante servisu operadór jogu iha Timor-Leste.

Ministru Turizmu, Komérsiu no Indústria, José Lucas do Carmo da Silva, hateten akordu ne’e importante tebes ba MTKI, liuliu inspesaun jerál jogu.

“Durante ne’e jogu iha ona, ita bele akumula sira didi’ak no dignu nune’e sira tau fiar ba Governu no bele kuidadu sira-nia osan,” Ministru José Lucas tenik hafoin selebrasaun akordu, iha edifísiu Mandarin, kinta ne’e.

Ministru Turizmu, Komérsiu no Indústria, José Lucas do Carmo da Silva, hamutuk ho Diretór Ezekutivu BNCTL, Brígido de Sousa, selebra akordu, iha edifísiu MTKI, Mandarin, kinta (26/11). Imajen TATOLI/Egas Cristovão

Tuir governante ne’e, parte MTKI tau fiar nafatin ba BNCTL, nu’udár Banku Nasionál Timor-Leste no sai mós hanesan parseiru Governu atu tau-matan ba osan ne’ebé mak mai hosi operadór jogu sira.

“Ita-nia kompromisu mak hamutuk hodi bele asegura servisu ho di’ak, nune’e jogadór no operadór sira bele halo tuir regra ne’ebé mak ministériu sei aplika iha futuru tuir mai,” nia akresenta.

Iha biban ne’e, nia agradese no hato’o  apresiasaun boot dirijentw Banku Komérsiu, ne’ebé disponível halo diskusaun no koordenasaun lubuk ida hodi to’o konkluzaun halo akordu.

Polítika VIII Governu Konstitusionál maka atu dezenvolve no diversifika ekonomia.

“Partikularmente jogu sosiál no tradisionál, hanesan parte reseita ne’ebé mak ita iha, tanba durante ne’e ita jere seidauk másimu. Tanba ne’e ita presiza hadi’a,” nia hatutan.

Ministru Turizmu, Komérsiu no Indústria, José Lucas do Carmo da Silva. Imajen TATOLI/Egas Cristovão

MTKI rasik hakarak hadi’a administrativamente, tanba ne’e sei iha diskusaun ho BNCTL atu jere kreatividade ne’ebé hamosu jogu, maibé osan tau iha banku seluk.

“Durante ne’e ita-nia kompañia jogu sira tau osan iha banku ne’ebé mak la hanesan, tanba ne’e ita se tau hamutuk iha banku ida,” Ministru dehan.

Entretantu operadór jogu ne’ebé rejista iha MTKI hamutuk 14.

Iha fatin hanesan, Diretór Ezekutivu BNCTL, Brígido de Sousa, konsidera akordu ne’e marka pasu importante Banku Komérsiu nia história no iha jestaun jogu sira ne’ebé iha.

“Akordu ne’e uluk iha ona maibé momentu ne’ebá ne’e simples de’it, atu regula fundu sira ne’ebé mak operadór jogu sira tenki tau garantia, nune’e bele hala’o jogu ho di’ak,” nia esplika.

Dirijente ne’e haktuir, uluk osan sira rai iha Banku seluk, hafoin Governu halo alterasaun no muda polítika tanba iha indísiu hatudu ema laiha osan maibé banku fasilita.

“Pasu ne’ebé MTKI hamutuk ho ekipa tomak hola importante tebés atu regula operadór jogu sira, tanba osan sira sei konsege akumula ba fundu, hanesan garantia ne’ebé tau iha BNCTL,” nia realsa.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here