Diretór Korean International Cooperation Agency (KOICA), Kim Sikhyon. Imajen TATOLI/Osória Marques.

DILI, 26 novembru 2020 (TATOLI)--Diretór Korean International Cooperation Agency (KOICA), Kim Sikhyon, hateten Timor-Leste tenke hatudu dalan demokrásia ba ema hotu-hotu atu nune’e sai ezemplár di’ak ba eleisaun iha futuru.

“Timor-Leste sai ezemplu eleisaun ne’ebé transparente, justu, no hatudu saida mak povu hakarak liuhosi dalan demokrásia ne’ebé ema barak simu. Timor-Leste tenke hatudu dalan demokrásia ba ema hotu-hotu atu nune’e sai ezemplár di’ak ba eleisaun iha futuru,” Diretór KOICA, Kim Sikhyon, hateten ba jornalista sira iha Ótel Turizmu, Lecidere, Dili, kinta ne’e.

Liuhosi votasaun nasionál ka bolu konsulta populár iha 1999, nia hateten, timoroan sira bele determina ninia destinu no ikus mai hetan independénsia, no mundu louva Timor-Leste ne’ebé realiza eleisaun jerál no partamentár nian iha 2017 no 2018.

Imajen TATOLI/Osória Marques.

Ho susesu iha momentu ne’ebá, tuir nia, órgaun eleitorál Timor-Leste nian hanesan Sekretariadu Téknika Administrasaun Eleitorál (STAE) no Komisaun Nasionál Eleisaun (CNC-sigla portugés) hala’o nia papél fundamentál iha implementasaun prosedimentu eleisaun ho justu, livre kredível no transparante.

“Ita-nia dalan sei naruk hodi istimula apoiu legál ba eleisaun. Hanesan, ita bele haree no rona distúrbiu barak hamosu manipulasaun ba lei ka regulamentu mak la klaru relasaun ho eleisaun iha mídia iha mundu tomak,” nia dehan.

Nia hateten, ida-ne’e importante tebes atu estabelese regra ka regulamentu eleisaun nian ho realístika, konsistente no inkluzivu hodi suporta ba demokrásia rohan laek.

“Ida ne’e fó benefísiu ba povu ki’ik sira. Ita tenke ho rigór, hodi revee no haree fila-fali regulamentu ka lei ne’e ho realístika liután no ho konsistente hodi bele hapara anarkia ruma iha futuru,” nia dehan. 

Eha enkontru ohin ne’e, Diretór COICA relata katak ema hotu nia esperiénsia prátiku no tenke hasa’e koñesementu hodi fahe ho ideia signifikadu kriasaun unifika lei sira eleisaun nian ho apropriadu tuir kondisaun Timor-Leste nian.

“Ikus liu, hanesan povu koreanu ne’ebé sai belun di’ak, bainhira timoroan luta ba moris di’ak. KOICA hodi povu koreanu sente orgullu tebes ho kontinuasaun fó kontribuisaun hodi hametin demokrásia iha Timor-Leste,” nia dehan.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here