iklan

HEADLINE, SAÚDE

MS sei harii postu saúde no rezidensia ba médiku hamutuk 24

MS sei harii postu saúde no rezidensia ba médiku hamutuk 24

Logo Ministériu Saúde.

DILI, 25 novembru 2020 (TATOLI)—Ministériu Saúde planea  iha 2021sei harii Postu Saúde no rezidensia ba médiku sira hamutuk 24 iha territóriu Timor-Leste.

Xefe Departamentu Jestaun Patrimoniu Infraestutura Ministériu Saúde, Alberto Martins, informa Ministériu Saúde prevee ona iha proposta Orsamentu Jerál Estadu 2021, atu konstrui postu saúde 12 no rezidensia ba médiku 12.

Postu Saúde foun hirak ne’e sei harii iha Munisípiu Aileu iha Suku Lekidoe no Faturilau, Ainaro sei kontrui iha Postu Administrativu Maubisse Suku Manelobas, Munisípiu Baucau, iha Suku Bualale, Kelikai, Bobonaro iha Suku Leber.

Iha Covalima iha Suku Beseuk, Ermera iha Hatulia B, Suku Hatulia Leten, Ermera Villa, Lautem iha Suku Fuat, Manatuto iha Suku Samalai Laleia, Manufahi iha Suku Fahi-nehan  Viqueque iha Ossu.

”Depois iha tan estensaun ba konstrusaun ba sentru internamentu ne’e ba iha territóriu tomak maibé iha orsamentu ne’ebé mak disponivel iha Ministériu Saúde ne’e iha Munisípiu neen  hanesan Aileu, Dili, Manatutu, Ermera, Lautem no Viquque,’’nia informa ba Tatoli iha ninia servisu fatin, kuarta ne’e.

Sentru Internamentu Aileu atu aumenta espasu no halo konstrusaun ba fatin konsultasaun pasiente, Munisípiu Dili sei harii sala maternidade iha Sentru Saúde Vera-Cruz no fatin internamentu iha Sentru Saúde Comoro.

”Iha Munisípiu Ermera sentru saúde internamentu Gleno ne’e kontrusaun edifisiu OPD atu halo alargamentu pasiente ninian no mós emerjénsia depois iha Munisípiu Lautem harii sentru internamentu Lospalos ninia projetu mak instalasaun agua potavel tanba sira problema ho bee moos,’’ tenik tan.

Iha Munisípiu Manatuto, sei harii sentru internamentu foun, no instala bee moos, no iha   Viqueque sei harii fatin internamentu liliu konstrusaun sala emerjénsia no estasionamentu transporte.

Jornalista : Felicidade Ximenes

Editór :Agapito dos Santos.

iklan
iklan

Leave a Reply

iklan
error: Content is protected !!