Logotipu Organizasaun Mundiál Komérsiu. Imajen/Espesiál

DILI, 25 novembru 2020 (TATOLI)Liuhosi reuniaun Konsellu Ministru (KM), Governu deside Ministru Koordenadór Asuntu Ekonómiku (MKAE), Joaquim Amaral, lidera negosiasaun adezaun Timor-Leste nian ba Organizasaun Mundiál Komérsiu (OMK).

“Konsellu Ministru aprova ona deliberasaun refere ba mandatu ba negosiasaun adezaun Timor-Leste nian ba Organizasaun Mundiál Komérsiu, ne’ebé aprezenta husi Ministru Koordenadór Asuntu Ekonómiku,” Ministru Prezidénsia Konsellu Ministru, Fidelis Manuel Leite Magalhãe, informa hafoin ramata reuniaun KM iha Palásiu Governu, kuarta ne’e.

Portavóz Governu ne’e esplika, ho deliberasaun ne’e mak autoriza negosiasaun adezaun Timor-Leste nian ba OMK no konfere mandatu ba ministru responsável ba koordenasaun asuntu ekonómiku atu halo negosiasaun ba prosesu adezaun nian.

Iha dezempeñu mandatu, ministru hetan apoiu husi delegasaun ne’ebé kompostu husi membru reprezentante sira ida husi kada departamentu Governu, ne’ebé dezigna husi membru ida-idak Governu hanesan Prezidénsia Konsellu Ministru, Ministériu Finansa, Ministériu Negósiu Estranjeiru no Kooperasaun, Ministériu Saúde, Ministériu Turizmu, Komérsiu no Indústria, Ministériu Agrikultura no Peskas, inklui Ministériu Petróleu no Minerál.

Governante ne’e dehan, husi gabinete Prezidénsia Konsellu Ministru, gabinete apoiu jurídiku mak sei hola parte tanba adezaun ba organizasaun mundiál komérsiu ne’e sei iha komponente legál barak.

“Entaun iha prosesu atu adere ne’e presiza haree didi’ak kuadru legál sira no bainhira nesesáriu maka halo adaptasaun ba rekezitu organizasaun ne’e no kuadru legál iha rai-laran iha ona maka bele informa ba OMK. Fiar katak prosesu negosiasaun ne’e sei la’o ho di’ak,” Fidelis garante.

Jornalista: Antónia Gusmão

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here