Vise-Ministru Interiór, António Armindo. Imajen TATOLI/Egas Cristovão

DILI, 25 novembru 2020 (TATOLI)–Governu liuhosi Ministériu Interór inklui ekipa legál husi Gabinete Primeiru-Ministru (GPM), hahú halo verifikasaun ba dívida Polísia Nasionál Timor-Leste (PNTL) iha operadór telekomunikasaun Telemor, ne’ebé halo instalasaun ba rede internet no Closed-circuit television (CCTV).

“Dívida Polísia Nasionál Timor-Leste, ne’e entre $200.000 to’o $500.000, ne’ebé seidauk selu ba Telemor hodi halo instalasaun internet no CCTV, ita haruka ona asesór legál husi Primeiru-Ministru bá haree atu idetifika karik hodi ita bele selu ka labele selu, maibé rezultadu verfikasaun husi asesor legál sira iha mak ita deside,” Vise-Ministru Interiór, António Armindo informa iha Palásiu Governu, kuarta ne’e.

Tuir governante ne’e, antes la halo kontratu ho Telemor, maibé halo de’it memoradu entedimentu  ne’ebé presiza haree legalidade hafoin halo pagamentu.

“Ita haree dokumentu sira legál ka la’e tanba barak maka laiha kontratu, maibé iha de’it entendimentu atu identifika karik ita bele selu ka labele selu,” nia akresenta.

Hatan ba atividade ilegál ne’ebé  komete husi operadór telekomunikasaun husi Vietnam ne’e, Vise-Ministru rejeita fó komentáriu tanba seidauk prosesu investigasaun la’o hela.

“Ha’u labele dehan la selu tanba ita seidauk hatene legál ka ilegál, tanba prosesu investigasaun sei la’o hela husi PNTL no Ministériu Públiku,” nia dehan. 

Iha sorin seluk, Vise-Ministru Interiór António Armindo, akomapaña husi asesór legál husi GPM Andre Rodrigues Teixeira Fernandes, hasoru malu ona ho  Komandante Jerál PNTL Komisáriu Faustino da Costa no Segundu Komandante Jerál PNTL Komisáriu Mateus Fernandes, hodi fó solusaun rápidamente posível ba situasaun dívida naun finanseira. 

Nia husu Komisáriu atu fó orientasaun ba parte finansa atu tau atensaun ba pagamentu dívida inklui halo estimativa ba reseita, atu nune’e dívida ne’ebé iha labele boot liu fali kapasidade ne’ebé atu selu iha futuru tanba sei aumentu iha despeza.

“Ami hasoru malu ona ho komisáriu na’in-rua hodi halo avaliasaun ba tusan PNTL hodi asegura ezekusaun ba Orsamentu Jeral Estadu (OJE) 2020 tenke la’o ba oin, atu nune’e hahú planu ba 2021 ne’e bele foka ba dezenvolvementu infraestrutura instituisaun nian, la’ós atu selu tusan,” nia hatutan.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here