Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, kuarta (25/11). Imajen TATOLI/Egas Cristovão

DILI, 25 novembru 2020 (TATOLI)-Liuhosi reuniaun Konsellu Ministru (KM), Ministru Administrasaun Estatál (MAE), Miguel Pereira de Carvalho, aprezenta opsaun polítika-lejizlativa sira hanesan baze ba projetu proposta lei ba divizaun administrativa territóriu no kriasaun kuadru orsamentál no finanseiru ba futuru autarkia lokál.

“Projetu divizaun administrativa territóriu nian, hakarak atinje armonizasaun liuhosi área jeográfika postu administrativu sira hodi aumenta asesu  ba servisu públiku sira,” Ministru Prezidénsia Konsellu Ministru, Fidelis Manuel Leite Magalhães, relata hafoin ramata reuniaun KM iha Palásiu Governu, kuarta ne’e.

Portavóz Governu ne’e esplika, kona-ba kriasaun kuadru orsamentál no finanseiru ba futuru autarkia lokál sira hodi garante autonomia poder lokál, hanesan hatuur ona iha Konstituisaun no iha proposta lei Poder Lokál no Desentralizasaun Administrativa, hodi garante autonomia finanseira no patrimóniál.

Konseitu desentralizasaun rasik la’ós atu loke instituisaun barak iha munisípiu, maibé atu hakbesik Governu sentrál ba povu, tanba ne’e presiza hakbiit liután rekursu umanu iha área administrasaun no jestaun.

Dezde tinan-2003 to’o agora, Governu halo preparasaun ba polítika desentalizasaun no halo sosializasaun molok implementa polítika desentralizasaun, bazea ba Konstituisaun Repúblika Demokrátika Timor-Leste (RDTL) artigu 72 no Planu Estratéjiku Dezenvolvimentu Nasionál (PEDN).

Antes ne’e, Governu anteriór fó ona delegasaun kompeténsia ba munisípiu Baucau, Bobonaro, Dili no Ermera.

Iha aprezentasaun orsamentu 2020 dahuluk, Primeiru-Ministru, Taur Matan Ruak, afirma iha tinan ne’e, Governu prevee ona orsamentu atu fortifika polítika desentralizasaun administrativa.

Ba inisiativa ida-ne’e, Governu prevee ona millaun $3, ne’ebé atu prenxe vaga  sira ne’ebé ezistente iha mapa pesoál autoridade munisipál no administrasaun munisipál sira.

Aleinde ne’e, prevee mós millaun $9,4, ne’ebé destina atu fó apoiu ba projetu autoridade munisipál  no administrasaun munisipál sira hodi promove Planu Dezenvolvimentu Integradu Munisipál (PDIM).

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here