Filtrasaun bee foer sai bee moos.Imajen/Google.

DILI, 25 novembru 2020 (TATOLI)—Estudante Ensinu Sekundária Jerál São Pedro  Comoro Dili, prodúz ona ai-moruk hodi halo filtrasaun ba bee fo’er sai bee moos hodi konsumu filafali.

Koordenadora Grupu Estudante São Pedro Comoro, Genedia Moreira, hateten ai-moruk hirak ne’e sira prodúz husi materia prima kompostu husi aluminiu potasaun ka potatio bee no aki-ben.

Nia hateten tenki tein uluk aluminiu no hidrosido potasaun ne’e to’o naben sai likuidu tiha maka ta’es filafali hodi haketak entre been no isin.

“Prosesu ikus mak kuandu ninia temperatura ne’e malirin ona mak kahur fali ho aki-ben hodi hein to’o isin tiha hanesan masin bele utuliza ba be’e ne’ebé merak no fo’er,” dehan nia iha Comoro, ohin.

Atu tein aluminiu  potation tenki okupa tempu to’o oras 24 nune’e bele hetan rezultadu ida di’ak.

“Agora maneira atu utuliza ne’e mak suru ai-moruk ne’e kanuru ida fakar ba bee merak ka bee fo’er ne’e ninia rezultadu fo’er ka tau sira ne’e sei haketak an no bee sei sai moos fali,”tenik tan.

Maski prodúz ona ai-moruk ne’e maibé sira la garante katak ai-moruk ne’e bele hamate mikrobiu ka kutun iha bee refere tanba ne’e presiza atu halo teste laboratóriu ida kle’an antes atu uza.

Entretantu, grupu estudante sira aprende siénsia ne’e tanba foti referensia husi internet depois konsulta liután iha livru kímika no apoiu husi mentor sira iha Eskola São Pedro Dili.

Jornalista : Tomé Amado

Editór:Agapito dos Santos

HAKEREK NO HATÁN

Please enter your comment!
Please enter your name here