Ministra Saúde, Odete Maria Freitas Belo. Imajen Tatoli /Egas Cristovão

DILI,24 novembru 2020 (TATOLI)—Hahú husi tinan 2003 to’o setembru 2020 rejista Timoroan hamutuk ema na’in 1.256 mak sofre moras HIV/SIDA, no na’in 140 mak mate ona, tuir dadus husi estatístika Ministériu Saúde ne’ebé revela husi Ministra Saúde Odete Maria Freitas Belo.

Husi pasiente HIV/SIDA 1.256 ne’e, pursentu 47 (%) maka halo tratamentu saúde rutina.

Notísia Relevante :2003 To´o 2019, Kazu HIV/SIDA Iha Timor-Leste Hamutuk 1039

“Atu dehan katak ita lakohi ema ida mate no moras tanba de’it moras HIV/SIDA, tanba ita hatene klaru moras ne’e ninia impaktu, no moras ne’e mai hosi ne’ebé, hada’et hanusa, ita hatene hotu ona, tanba ne’e agora tempu ita hamutuk atu hakotu moras ne’e,” dehan Governante ne’e ba jornalista sira iha Salsaun enkontru UNDIL Dili, tersa ne’e.

Pasiente HIV/SIDA na’in 140 ne’ebé mate ona tanba balun sofre moras komplikadu, no balun lakohi halo tratamentu rutina.

“Hanesan ha’u dehan sira mate la’ós tanba ekipamentu mak laiha maibé tanba sira moras komplikasaun. Komplikasaun ne’ebé durante ne’e mate barak liu iha moras HIV/SIDA ne’e mak moras tuberkoluze (TBC), tanba moras iha ona maka HIV/SIDA kona-tan ne’e imunidade ba isin lolon ne’e nia labele tahan,” nia esplika.

Membru Governu ne’e hateten Ministériu Saúde iha ona polítika prevensaun liuhosi semináriu no sensibilizasaun informasaun bo joven sira hodi kombate HIV/SIDA.

“Ami fahe informasuan la’ós tanba besik komemora loron HIV/SIDA nian, maibé ami-nia Diretór sira sempre fó formasaun ba komunidade liliu joven feto no mane liuhosi eskola, semináriu nomós iha fasilidade saúde sira, sempre fó informasaun liliu ba ita-nia-inan isin rua ne’ebé ba konsulta, no se de’it ba konsulta iha ospitál ita hetan kazu fó deteksaun sedu, ida ne’e maka polítika hosi MS nian oinsá atu komate HIV/SIDA,” nia tenik.

Governante ne’e konsidera kazu HIV/SIDA iha Timor-Leste ho númeru kiik maibé presiza fó atensaun sedu hodi halo prevensaun.

Notísia Relevante :CNCS-TL Komemora Loron Mundiál HIV/SIDA Ba Dala 16

Jornalista :Felicidade Ximenes

Editór :Agapito dos Santos

HAKEREK NO HATÁN

Please enter your comment!
Please enter your name here