Sporting Clubo de Timor (SCT) halakon Academica FC ho festa golu 6-0. Imajen Tatoli/António Gonçalves

DILI, 24 novembru 2020 (TATOLI) – Ekipa Sporting Clubo de Timor (SCT) susesu halakon  Academica FC ho festa golu 6-0 iha kontinuasaun Tasa 12 Novembru ne’ebé hala’o iha Estádiu Munisipál Dili, ohin loraik.

Jogadór-sira Sporting Clubo de Timor (SCT) ho ksolok selebra sira-nia votória bainhira manan Academica 6-0. Imajen Tatoli/António Gonçalves

Hosi vitória ne’ebé SCT hetan lori ekipa ne’e hakat ona ba oitavu finál tasa 12 Novembru, époka ne’e, hodi hein ekipa seluk tuir mai.

Jogu ne’e hala’o iha ámbitu “fair play” tanba ekipa rua hatudu jogu ne’ebé di’ak. Maibé sorte boot monu liu ba ekipa SCT tanba iha kbiit ne’ebé maka’as kompara ho Academica.

Academica maski kbiit la sufisiente atu aguenta ho SCT, maibé ekipa ne’e nafatin tenta halo presaun, maibé esforsu hirak ne’e la  konsege fó biban atu marka golu ba guarda rede SCT.

Oportunidade vitória monu ba SCT nia liman iha minutu 19 liuhosi jogadór Silvestre G (21) ne’ebé ba dahuluk lees rede guarda rede Academica 1-0.

Jogu komesa manas liu tan tanba SCT hetan oportunidade barak liu hodi halo presaun, halo mós jogadór Academica sira iis halai sala iha kampu-laran. Iha minutu 43, Lecy Atok (8) oferese tan golu segundu hodi loke luan tan oportunidade ba SCT atu “kombate” Acedimca.

Hosi golu rua-ne’e mak termina ona minutu primeira parte laiha tan golu ruma mak akontese no vitória provizóriu hela ba SCT ne’ebé ukun ho score 2-0.

Hakur ba segunda parte ekipa rua nafatin halo presaun ba malu. Academica halo mudansa ba tékniku jogu no estratéjia jogu, maibé mudansa hirak ne’e hela de’it hanesan mudansa tanba la rezulta golu ruma.

Iha minutu 48 Silvestre G (21) hosi SCT halo tan golu ida hodi hasae score ba 3-0  no halo Academica nia ritmu jogu sai fraku tiha tanba labele ona aguenta ho presaun.

Iha minutu tuir mai Florindo Magno (19) lansa tan golu ida hodi dudu rezultadu ba 4-0. Hosi golu ne’e halo Academica atu rende sala-sala, maibé tanba dignidade ekipa refere kontinua luta nafatin maski kbiit la to’o ona.

Vitória SCT nian komesa luan ba beibeik tanba iha minutu 88 Francisco Locateli lansa tan golu ida hodi lori rezultadu ba 5-0. Nune’e iha minutu 90+3 Zito Moreira (5) lansa golu ikus hodi kompleta vitória fiksu ba SCT hodi hakat ba oitavu finál no Academica tenke husik ona Estádiu Munisipál Dili hodi hein fali jogu tasa 12 Novembru, iha tinan oin.

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here