PDHJ partisipa iha semináriu anuál South East Asian National Human Right Institutions Forum (SEANF) ba tinan 2020 ne’ebé realiza virtualmente hosi plataforma Cisco Webex (online). Imajen/PDHJ

DILI, 24 novembru 2020 (TATOLI)-Provedoria Direitu Umanu no  Justisa (PDHJ)  partisipa iha semináriu anuál South East Asian National Human Right Institutions Forum (SEANF)  ba tinan 2020 ne’ebé realiza virtualmente  hosi  plataforma Cisco Webex (online) durante loron-tolu hahú hosi loron 24 to’o 26 novembru 2020.

Enkontru ne’e partisipa direita hosi Provedora PDHJ, Jesuína Maria Ferreira Gomes, akompaña hosi Provedora Adjunta Direitu Umanu, Benícia Eriana Magno, Sekretáriu Ezekutivu PDHJ, Aureo José Antonio Savio, Diretora Investigasaun PDHJ, Rosalina de Jesus Pires, Asesora  Legal inklui tékniku na’in-rua.

Nota komunikadu imprensa hosi PDHJ ne’ebé Agência Tatoli asesu, ohin, relata ajenda SEANF anuál meeting ka enkontru anuál ba tinan ne’e realiza hosi Komisi Nasional Hak Asasi Manusia (Komnas HAM) Indonézia iha Jakarta, maibé ho situasaun pandemia Covid-19 ne’ebé ataka nasaun hotu iha mundu maka ekipa téknika working group ba tinan  ne’e deside atu realiza de’it ho plataforma Cisco Webex (online).

South East Asia National Human Rights Institutions Forum  ka Forum Instituisaun Nasionál Direitu Umanu Sudeste Aziátiku, hanesan rede Sub-Regional Instituisaun Nasionál Direitu Umanu neen (6) hanesan the Indonesian National Human Rights Commission (Komnas HAM), the Human Rights Commission of Malaysia (SUHAKAM), the National Human Rights Commission of Thailand (NHRCT), The Myanmar National Human Rights Commission (MNHRC), the Commission on Human Rights of the Philippines (CHRP) no PDHJ

SEANF estabelese iha 2004, iha Bangkok-Tailándia, inisia hosi nasaun haat (4) hanesan Indonézia, Malaysia, Filipina no Tailándia. Iha 2009 Timor-Leste sai hanesan membru ba dalima no iha 2012, Myanmar sai hanesan membru ba daneen.

Objetivu jerál hosi SEANF mak atu organiza membru-sira hanesan mekanizmu rejionál atu halo promosaun ne’ebé efikás, protesaun no hakonu direitu umanu ema hotu nian iha nasaun membru iha Sudeste Aziátiku.

Programa no atividade SEANF iha isu direitu umanu lima ne’ebé sai hanesan isu komún maka, terrorizmu, tráfiku umanu, protesaun ba migrante no traballadór migrante, promosaun ba direitu ekonómiku, sosiál no kulturál no mós direitu ba edukasaun.

Jornalista   : Nelson de Sousa

Editór        : Francisco Simões

 

HAKEREK NO HATÁN

Please enter your comment!
Please enter your name here