Diálogu komunitáriu ho MAPKOMS no SEKOMS, iha suku Ossu de Cima, tersa (24/11). Imajen TATOLI/Domingos Piedade Freitas

VIQUEQUE, 24 novembru 2020 (TATOLI)—Komunidade iha suku Ossu Leten, postu administrativu Ossu, munisípiu Viqueque la konkorda harii torre transmisaun iha área Tunia, iha foho Mundo Perdido nia leten.

Komunidade sira hato’o asuntu ne’e, liuhosi diálogu komunitáriu ho Ministériu Asuntu Parlamentár no Komunikasaun Sosiál (MAPKOMS) no Sekretaria Estadu Komunikasaun Sosiál (SEKOMS), ho tema ‘importánsia harii torre transmisaun, hodi tulun komunidade Viqueque asesu informasaun kona-ba prosesu dezenvolvimentu liuhosi plataforma dijitál’.

Komunidade suku Ossu de Cima, Gilberto Hornay, konsidera atu harii infraestrutura ne’e la’ós buat kiik ida, tanba sei okupa fatin hanesan loke estrada, estraga ambiente no lisan beiala sira nian.

“Fatin Tunia nu’udar beiala sira-nia fatin lulik no ninia natureza hanesan área protejida, tanba ne’e kuandu la halo tuir didi’ak maka ninia impaktu ba populasaun Ossu-oan sira. Ami la konkorda atu harii torre transmisaun iha Tunia,” Joven Ossu-oan ne’e tenik iha diálogu komunitáriu iha suku Ossu Leten, tersa ne’e.

Razaun seluk maka líder komunitáriu sira iha baze seidauk ko’alia diteitamente ho populasaun Tunia.

“Ha’u hanoin sei la konkorda tamba líder lokal sira la respeita ami no hakat liu ami, la bele lori uluk komunidade nia naran, komunidade idaidak iha ninia área ne’e mak Tunia, la’ós jerál,” nia akresenta.

Iha fatin hanesan, Alípio Freitas Hornay, la konkorda harii torre transmisaun iha foho leten tanba hanesan área protejida.

Hatan ba kestaun ne’e, Ministru Asuntu Parlamentár no Komunikasaun Sosiál, Francisco Jerónimo, konsidera preokupasaun komunidade.

“Se ita bo’ot sira dehan la bele, ami labele halo buat ida no imi mós labele fó sala ba Governu dehan labele halo buat ida ba imi,” nia dehan.

Ba kestaun ne’e, governante ne’e konsidera, presiza iha liña koordenasaun entre líder komunitáriu, administradór no Governu sentrál.

“Ami halo koordenasaun atu halo estudu, ami seidauk halo buat ida no la hadau buat ida iha Tunia, ami halo estudu atu hatene de’it katak iha posibilidade harii torre transmisaun. Governu la hadau no la obriga, maibé mai ko’alia ba malu atubele iha solusaun,” nia fó hanoin.

Tuir Ministru, Governu mai ho programa integradu no bazeia ba povu nia nesesidade.

Membru ezekutivu ne’e esplika, razaun harii torre iha Mundo Perdido atu populasaun fásil asesu informasaun.

“La signifika Timor-Leste tenke halo tuir rai seluk, maibé labele nonok no izola-an iha fatin de’it, tenke la’o hamutuk ho sira ba oin atu asesu informasaun oin-oin,” nia hatutan.

Nia espera parte hotu bele fó kontribuisaun hodi bele hetan solusaun di’ak liu.

Aleinde ne’e, Governu hakarak diversifika área komunikasaun sosiál, tanba ne’e presiza infrastrutura adekuadu atu bele fasilita transmisaun liuhosi rádiu no televizaun.

“Atu nune’e ita-nia komunidade sira bele iha asesu la’os de’it iha nível urbana, maibé  mós ba nível rurál sira hotu. Tamba komunidade foin mak 48% asesu informasaun,” nia informa.

Objetivu harii torre ne’e atu bainhira komunidade atu asesu ba televizaun, lalika uza ona parabola, tanba toree ne’e sei folu liu ba televizaun.

Aleinde ne’e, iha posibilidade ba operadór telekomunikasun sira uza fatin ne’e hodi bele hatama reseita ba Rásiu Televizaun Timor-Leste, Empreza Públika (RTTL, E.P) no mós ba komunidade sira iha area ne’e.

Partisipa iha diálogu komunitáriu ne’e maka hanesan Sekretáriu Estadu Komunikasaun Sosiál Merício Juvinal dos Reis ‘Akara’, Prezidente interinu Agência TATOLI Manuel Pinto, Prezidente RTTL,E.P Francisco Gari, Diretór Nasionál Diseminasaun Informasaun (DNDI) Estevão Belo, líder komunitáriu suku Ossu de Cima, Builale, Liaruka no Loihunu inklui komunidade lokál.

Jornalista: Domingos Piedade Freitas

Editora: Julia Chatarina

HAKEREK NO HATÁN

Please enter your comment!
Please enter your name here