Ekipamentu pezadu IGE hasai sedimentasaun iha mota Manleuna. imajen/MOP

DILI, 24 novembru 2020 (TATOLI)—Relasiona ho tempu udan, Ministru Obra Públika, Salvador Eugênio Soares dos Reis Pires, fó ona orientasuan ba Diresaun Nasionál Estrada, Ponte no Kontrolu Cheia no Institutu Jestaun Ekipamentu (IGE, sigla prortugés) hasai sedimentasaun iha mota sira.

Ministériu Obra Públika (MOP) hahú identifika mota sira ne’ebé fó risku ba inundasaun hanesan mota Becuse, Maloa, Mota Hera, Manleuana no Mota Bidau.

“Agora daudaun bazeia ba orientasaun Ministru, Diresaun Estrada no IGE hasai sedimentasaun sira iha mota ne’ebé indetifika risku ba inundasaun iha tempu udan, maski empreza balun hahú konstrui ponte no barrajen sira,” Diretór Nasionál Estrada, Ponte no Kontrolu Cheia, João Mário Gama de Sousa, informa ba Agência TATOLI iha ninia knaar fatin, Comoro, tersa ne’e.

Aleinde ne’e, Ministru mós orienta atu ekipamentu pezadu institutu tenke mantein iha fatin risku sira, nune’e bainhira udan tuun bele hasai ai no fatuk sira hodi labele hamosu inundasaun ba komunidade sira.

“Ami garante ho esforsu tomak atu udan boot ne’ebé mai labele fó impkatu ba komunidade sira, liuliu ema sira besik mota.  Ami mós husu ba komunidade besik mota ninin tenke kuidadu-an iha tempu udan,” nia akresenta.

Antes nee, MOP asina ona kontratu faze dahuluk ho kompañia sia atu halo rekuperasaun obra Estadu ne’ebé hetan estragu husi inundasaun iha fulan-marsu 2020.

“Ita asina kontratu ho kompañia sira atu ezekuta obra emerjénsia hodi halo rekuperasaun ba inundasaun ne’ebé akontese iha loron 13 marsu, nune’e bele prevene inundasaun hafoin udan,” nia haktuir.

Ekipa tékniku aprezenta ona obra Estadu ne’ebé hetan estragu kauza inundasaun hamutuk 28, maibé hafoin ekipa legál interministeriál halo validasaun tuir Lei Aprovizionamentu artigu 92 no 94, katak iha risku ba saúde públika, sanemanetu inklui no movimentasaun públiku.

Tanba ne’e, husi totál ne’e fahe ba projetu 16 ne’ebé maka prense rekezitu sai projetu emerjénsia no projetu 12 tama ba prosesu normál tanba la prense rekezitu emerjénsia.

Tipu obra emerjénsia maka hanesan ponte My Friend, Becusse, Hera, retensaun ba barreira sira, estrada no hadi’a Eskola 5 de Maio, Sérgio Veira de Melo inklui obra seluk tan.

Ho nune’e, empreza sira daudaun ne’e kontinua ezekuta projetu ne’e tuir tempu ezekusaun no kualidade obra hafoin Governu halo pagamentu.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here