Diretór Nasionál Estrada, Ponte no Kontrolu Cheia, João Mario Gama de Sousa. Imajen/Florencio Miranda Ximenes

DILI, 24 novembru 2020 (TATOLI)--Governu liuhosi Ministériu Obra Públika (MOP) fó ona indemnizasaun faze datoluk ba abitante afetadu projetu estrada husi Tasi-tolu to’o rotunda Comoro.

“Ami halo pagamentu etapa datoluk ba afetadu hamutuk  kuaze 160, husi abitante afetada na’in-49 no sei falta  etapa ida tan hamutuk uma sia, inklui mós eskola São Arcanjo Miguel, ne’ebé 2020  seidauk konsege konklui no ami hein tinan oin maka konsege halo pagamentu finál atu abitante afetadu sira bele husik fatin ne’e atu halo konstrusaun ka haluan estrada,” Diretór Nasionál Estrada, Ponte no Kontrolu Cheia, João Mário Gama de Sousa, informa ba Agência TATOLI iha ninia knaar fatin, Comoro, tersa ne’e.

Pagamentu faze dahuluk to’o datoluk ne’e kálkulu indemnizasaun ba komunidade afetada hamutuk millaun $1,6.

Tuir Diretór Nasionál ne’e, kuandu hetan ona pagamentu liuhosi konta bánkaria, Governu determina tempu ba abitante atu mobiliza sasán hodi husik fatin ne’e.

“Ami fó ba sira fulan-tolu atu aruma sasán no buka fatin, maibé iha loron ne’e abitante afetadu ne’ebé hetan ona pagamentu maibé kontinua hela, mak ekipa ministeriál sei muda obrigatóriamente, maibé durante ne’e komunidade koopera tebes ho ekipa interministeriál,”  nia akresenta.

Abitante balun hahú halo ona mobilizasaun atubele hamamuk área konstrusaun.

“Ami esforsu atu 2021, pagamentu bele hotu no komunidade afetadu sira bele husik hotu fatin ne’e atu kompãnia hahú  projetu ne’e,” nia nia hatutan.

Abitante sira ne’e hetan pagamentu, hafoin MOP hamutuk ho ekipa interministeriál sira aprezenta padraun indemnizasaun.

Ekipa interministeriál ne’e kompostu husi MOP, Ministériu Justisa (MJ), Ministériu Administrasaun Estatál (MAE), Ministériu Agrikultura no Peska (MAP), Autoridade Munisipál Dili no líder komunitáriu sira.

Presu Kompensasaun ba kada Tipu Sasan Afetadu Uma temporária ho kategoria hanesan didin ne’ebé uza kalen ka piku, ai-kabelak ka au, rai simentetadu, kakuluk uza tali metan no odamatan ho janela normál, sei selu metru kuadradu ho kustu $40.

Uma semi-permanente ho tipu didin meia- parede kombinasaun ho kalen, rai semetadu ka keramik, kakuluk uza talin kalen ka tali metan, odamatan no janela normál, selu ho kustu $80 ba kada metru kuadradu.

Uma permanente normál, ho karáter didin parede tomak, rai simentadu ka karamik, kakuluk uza kalen, odamatan no janela normál, didin la reboka no pinta ho kustu $110 ba kada metru kuadradu. Uma permanente luxu, ho karáter konstrusaun didin parede tomak (kompletu ho reboka no pinta), rai keramik, kakuluk uza kalen plástiku, foru kompletu (materiál kualidade), odamatan no janela (materiál kualidade), ho kustu $150 ba kada metru kuadradu.

Entretantu ba lutu temporária ho materiál uza kalen ka piku, ai-kabelak ho kustu $2 ba kada metru, lutu arame (cyclone wire) ho kustu kada metru $6, no lutu permanente normál ho fondasaun koluna normál, uza besi no batako, maibé la reboka kada metro $40 inklui lutu permanente luxu kada metru $120.

Ba Ahi-horis sei kontinua selu tuir padraun ne’ebé aprova husi Ministériu Agrikultra no Peska iha 18 jullu 2014 husi eis Ministru Mariano Assanami Sabino.

Ai-teka selu tuir idade hahú kada hún ida $5 to’o $30, Ai-mahoni kada hún $3 to’o $25, Ai-kameli hún ida $10 to’o $60, nu’u kada hun ho kustu $25 to’o $60, ai-kalju ho kustu $15, ai-kakao $15, Bua $25, malus presu unidade ida $5, kami $35, aidila hún ida $5, hudi hún ida $15, Sabraka hún ida $10, Kulu jaka hún ida $15 inklui ba presu modo jerál hahú husi sentavu 0,20 too $20.

Antes ne’e, Ministru Obra Públika, Salvador Eugênio Soares dos Reis Pires, orienta ona ekipa interministeriál atu aselera libertasaun husi Tasi-tolu to’o rotunda Comoro. Governu iha responsabilidade tenke prepara kondisaun infraestrutura estrada molok Portu Tibar ne’e halo operasaun iha tinan-2021.

“Kuandu infraestrutura portu ne’e tama iha operasaun, iha akordu Governu tenke prepara no prontu ona atu sustenta operasaun Portu Tibar nian, tanba kestaun ne’e urjente uitoan se la’e Governu kona koima $50.000 kada loron”, nia argumenta.

Estrada Tasi-tolu to’o rotunda Comoro ne’e kuaze kilómetru rua hamutuk ho pakote estrada trosu Tibar to’o Tasi-Tolu ne’ebé kaer husi kompañia internasionál China Wuyi ho kustu millaun $12-resin, hahú iha loron 28 fevereiru 2017 to’o outubru 2019.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here