Ofisiál Advokásia ADTL, Verónica Tilman. Imajen TATOLI/Jogerjo Guterres

DILI, 24 novembru 2020 (TATOLI)-Asosiasaun Defisiente Timor-Leste (ADTL) rekomenda Governu atu ratifika lalais konvensaun Organizasaun Nasaun Unida (ONU) ba direitu ema ho difisiénsia.

“Ami-nia rekomendasaun esensiál maka presiza ratifika direitu ema ho difisiénsia, tanba ema hirak ne’e barak mak hasoru diskriminasaun hanesan violénsia, tanba ne’e ami hanoin importante loos atu Governu ratifika iha tinan 2021,” Ofisiál Advokásia ADTL, Verónica Tilman, hato’o liuhosi aprezentasaun iha salaun enkontru Fórum Organizasaun Naun Governamentál (FONGTIL), Caicoli, tersa ne’e.

Nia konsidera, ratifikasaun konvensaun  importante atu sai baze no mós atubele fortifika liután lei ne’ebé iha ona hodi garante sidadaun ho difisiénsia sira.

Aleinde ne’e, asosiasaun ne’e husu ba Governu atu estabelese sentru integradu saúde mentál iha Timor-Leste, atu nune’e bele fasilita no halo atendimentu dignu.

“Loos duni katak iha ona fatin lokaliza iha Laklubar (manatuto), maibé la sufisiente no simu ema na’in-10 de’it. Dalaruma sira ne’ebé hemu ai-moruk no fila ba uma família, ladún halo tratamentu di’ak hodi halo kondisaun bele filafali. Entaun presiza fatin espesífiku ba sira atu hela, nune’e sira seguru no moras bele rekupera loloos mak bele fila hamutuk ho família,” nia akresenta.

ADTL husu ba Ministériu Edukasaun, Juventude no Desportu (MEJD) atu realiza ezame ekivalénsia tanba ema ho difisiénsia sira ezije katak sira hetan ona diploma pre-sekundáriu maibé sekundáriu maka seidauk.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here