Prezidente Repúblika, Francisco Guterres ‘Lú Olo’ fo pose ba Rui Gomes, iha Palásiu Prezidensiál, Bairro Pité, segunda (23/11). Imajen/Mídia PR

DILI, 23 novembru 2020 (TATOLI)—Prezidente Repúblika, Francisco Guterres ‘Lú Olo’, ofisialmente fó pose ba Rui Augusto Gomes atu asume kargu Ministru Finansa hodi subtitui Fernando Hanjam, tanba konfiasa atu hadi’ak dezempeñu finanseiru no ekonómiku iha Timor-Leste.

Iha diskursu, Xefe Estadu saúda Rui Gomes, tanba simu resposabilidade husi Primeiru-Ministru, Taur Matan Ruak, atu asume kargu ne’e.

“Ho konfiansa tomak no esperansa, katak dezempeñu finanseiru no ekonómiku husi Governu no setór públiku ein jerál sei hadi’ak liután, mak ha’u deside nomeia Rui Gomes nu’udar Ministru Finansa,” PR Lú Olo afirma iha ámbitu tomada pose ba Ministru Finansa foun iha Palasiu Prezidesiál, Bairro Pité, segunda ne’e.

Notísia Relevante: Xefe Estadu dekreta nomeasaun Rui Gomes sai Ministru Finansa

Nomeasaun Rui Gomes ba Ministru Finansa sai efeitu liuhosi Dekretu Presidensiál númeru 68/ 2020, públika ohin Iha Jornál Repúblika, hodi subtitui Fernando Hanjam, ne’ebé ezeoneradu tanba kestaun saúde.

Xefe Estadu dezeja Fernando Hanjam bele rekupera lalais saúde hodi halo ninia knaar profisionál.

“Ita-nia espetativa boot tebes katak Rui Gomes, nu’udar Ministru Finansa sei husik marka pozitivu no ezemplár ba VIII Governu no ba ita-nia país,” Xefe Estadu dehan.

Nune’e, Prezidente Repúblika husu ba Ministru Finansa foun atu hatuir mata dalan prinsipál VIII Governu nian ba planu rekuperasaun ekonómika.

Governu mós konta ministru foun ne’e ba tarefa plaenamentu no monitorizasaun anuál orsamentu no finansa públika inklui atu kontribui ho efikásia, efisiénsia no efetividade ba jestaun finansa públika, atubele hadi’ak servisu aprovizionamentu, desentralizasaun finaseira, jestaun rigoroza ba konta públika atu hasa’e ekonomia nasionál.

Xefe Estadu mós husu atu planu rekuperasaun ekonómika, ne’ebé prepara husi komisaun ba elaborasaun, ho pedidu husi VIII Governu no aprova ona husi Governu, haree liuliu ba ema tanba iha medida atu hamenu lalais impaktu husi krize pandémika no iha mós medida ho prazu médiu no naruk ne’ebé hakarak hala’o atu hadi’ak kondisaun moris populasaun, rendimentu família, no mós atu hasa’e babeibeik ekonomia ita-nia rai.

Seremónia pose ne’e partisipa husi Primeriu-Ministru, Taur Matan Ruak, Prezidente Tribunál Rekursu, Prokuradór Jerál Repúblika, Membru Governu sira, Membru Deputadu iha Parlamentu Nasionál, Reprezentan Xefe Estadu Maiór Forsa Defeza Timor-Leste, Falur Rate La’ek no konvidadu sira seluk.

Jornalista: Florêncio Miranda Ximenes

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here