Sekretária Estadu Igualdade no Inklusaun, Maria José da Fonseca Monteiro de Jesus. Imajen/ António Goncalves

DILI, 23 novembru 2020 (TATOLI)—Sekretária Estadu Igualdade Inkluzaun (SEII), Maria de Jesus Fonseca hateten, ohin, SEII hamutuk ho Korean International Cooperation Agency (KOICA) no Nasaun Unida asina akordu ida kona-ba kombate violénsia hasoru labarik no feto sira iha Timor-Leste.

“Ohin asina akordu ho KOICA ho Nasaun Unida nian ba programa foun hamutuk ho igualdade ne’ebé mak apoiu hosi Governu Corea nian ne’ebé liuhosi Nasaun Unida mai Governu Timor-Leste ho esforsu atu kombate violénsia hasoru feto no labarik feto iha TL,” Sekretária Estadu Igualdade Inkluzaun (SEII), Maria de Jesus Fonseca, informa ba Agência TATOLI iha serimónia asina akordu kona-ba kombate violénsia hasoru labarik no feto sira iha Timor-Leste, iha Ótel Timor, Dili, segunda ne’e.

Governante ne’e haktuir, programa refere ne’e SEII sei implementa iha Munisípu Baucau ho Dili inklui ho Rejiaun Administrativa Espesiál Oé-Cusse Ambeno (RAEOA), iha nível nasionál ne’ebé mak ninia koordenasaun besik ho SEII no ba instituisaun ne’ebé mak lidera planu asaun nasionál violénsia bazea ba jéneru.

Entretantu, Ministru Prezidénsia Konsellu Ministru, Fidelis Manuel Leite Magalhães hateten, projetu ne’e atu kontribui ba prevensaun violénsia bazea ba jéneru no disponibiliza rekursu ne’ebé sufisiente.

“Programa ne’e sei destina iha implementasaun no monitorizasaun lejislasaun no polítika violénsia bazea ba jéneru iha espasu polítika ho espesiál atensaun ba feto sira iha situasaun vulnerabilidade boot ne’ebé konsidera kondisaun fíziku no mentál no hela iha área risku boot ba dezastre naturál,” Ministru Fidelis hateten hafoin reuniaun Konesellu Ministru, foin lalais ne’e.

Programa ne’e hetan apoiu hosi SEII no mós ho parseiru dezenvolvimentu sira hotu atu foku makaas ba realizasaun kompaña nasionál ida hodi halo konsensializasaun atu redús violénsia bazea ba jéneru.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here