Parlamentu Nasionál. Imajen Tatoli/ Egas Cristóvão

DILI, 20 novembru 2020 (TATOLI)—Progresu taxa ezekusaun orsamentál Governu nian tinan fiskál 2020 to’o loron sesta (20 novembru 2020) meudia ne’e atinje ona 58.6%.

Progresu ezekusaun ne’e Agência TATOLI asesu liuhosi Portál Transparénsia hosi Ministériu Finansa, katak orijen $1,497,042,620.00, kompromisu sira $98,269,700.96, obrigasaun sira $39,177,421.76, atuál ezekuta ona $838,773,705.56, saldo hela $520,786,126.2

Entretantu despeza tinan fiskál 2020 biliaun $1.497,1, ne’ebé prevee ba saláriu no vensimentu millaun $206,7, bens (sasán) no servisu millaun $499,3, transferénsia públika millaun $568,7, kapitál minór millaun $8,9 no kapitál dezenvolvimentu millaun $213,4. Orsamentu fiskál 2020 nian ezekuta liuhosi rejime duodesimál.

Hosi montante orsamentu biliun $1.496,1 gasta ona balun hahú hosi janeiru to’o setembru liuhosi Dotasaun Temporária Orsamentál (DOT) no resta orsamentu ezekuta ba fulan outubru, novembru no dezembru 2020.

Totál despeza ba Orsamentu Jerál Estadu 2020 biliaun $1,497.1 (la inklui atividade ne’ebé finánsia hosi doadór sira ho valór millaun  $184.0,  liu  1.0%  kompara  ho  orsamentu 2019 nian.

Timor‐Leste iha rejime duodesimál (DOT) durante tinan 2020 nia laran tanba orsamentu la aprova tuir kalendáriu regulár ne’ebé iha. Limite de’it ba 1/12 hosi orsamentu orijinál tinan kotuk mak bele fahe kada fulan.

Ida-ne’e signifika funsaun esensiál Governu nian bele kontinua maibé polítika balun ne’ebé fora hosi atividade anuál labele implementa, inklui  projetu infrastrutura importante balun.

Iha proposta  OJE ne’e alokasaun ba kapitál minór no kapitál dezenvolvimentu sei aumenta iha últimu mes hosi orsamentu la’ós DOT 2020, nomoos inklui ona millaun $220.2 ba Fundu Covid‐19 atu responde servisu saúde no rekuperasaun ekonómika.

Montante orsamentu biliaun $1.497,1 foti hosi fundu petrolíferu millaun $963,9. Montante orsamentu ne’e Rendimentu Sustentável Estimadu (RSE) millaun $544,4 no transferénsia superiór RSE millaun $419,5.

Entretantu reseita naun-petrolífera millaun $770.6 komposta hosi reseita tributária millaun $165,0, reseita propria millaun $6,8, doasaun millaun $10,7, jurus millaun $0,5, saldo jerénsia millaun $527,6 no empréstimu millaun $60,0.

 Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here