Xefe Sentru Saúde Gleno, José de Carvalho Imajen Tatoli/António Gonçalves

GLENO, 20 novembru 2020 (TATOLI)—Xefe Sentru Saúde Gleno, José de Carvalho, hateten ninia parte kontinua halo promosaun saúde ba komunidade hodi prevene an husi moras hada’et no la hada’et.

“Profisionál saúde sira nafatin halo promosaun saúde ba komunidade sira  no mós nafatin hala’o programa  SISKA,  vizita  saúde iha familia hodi nafatin fó informasaun ba sira para ema idaidak prevene  ninia an liuhusi  fase liman, bainhira aman sira fuma labele besik labarik kiik sira tanba bele hamosu moras ISPA,” nia informa ba Tatoli, iha Gleno,kinta ne’e.

Pasiente ho moras infeksaun vias respiratóriu ka ISPA ne’ebé rejista iha Sentru Saúde Gleno hahú husi janeiru to’o meadu novembru ne’e hamutuk 5.727, depois moras kulit ne’ebé barak liu afeta ba labarik kiik husi tinan 0 to’o 5.

”Kauza husi moras ISPA ne’e mak ita hotu hatene bailoron naruk rai rahun maka’as  entaun moras sira ne’e maihusi atetude ita-nia an rasik dalaruma ita la’o la uza máskara,’’tenik tan.

Entretantu, Sentru Saúde Gleno iha profisionál saúde hamutuk 59 kompostu husi parteira, enfermeiru, doutór, médiku no seluk tan.

Mezmu nune’e, nia parte sei kontinua enfrenta problema menus rekursu umanu.

Jornalista : Felicidade Ximenes

Editór:Agapito dos Santos

HAKEREK NO HATÁN

Please enter your comment!
Please enter your name here