Sekretária Meza Parlamentu Nasionál, Deputada Lídia Norberta dos Santos Martins, Lidia Norberta dos Santos Martins.

DILI, 20 novembru 2020 (TATOLI)—Parlamentu Nasionál, semana oin, sei diskute hikas lei protesaun sivíl iha plenária.

“Lei protesaun sivíl ne’e mós pendente hela entaun semana oin iha 23 lokraik no 24 novembru sei iha posibilidade atu realiza plenária ida hodi deside lei refere la’o halo nusá. Iha opsaun rua. Ida, ajusta no ida seluk altera tuir pedidu Prezidente Repúblika nian,” Sekretária Meza Parlamentu Nasionál, Deputada Norberta Soares Martins, informa liuhosi konferénsia imprensa, iha sala GMPTL, Parlamentu Nasionál, sesta ne’e.

Parlamentu Nasionál (PN) aprova dekretu-lei númeru 16/V (2a)-Lei Protesaun Sivíl ne’e iha loron 21 jullu 2020 ho rezultadu votasaun a-favór 57, kontra 0 no abstensaun 4.

Prezidente-Repúblika, Francisco Guterres “Lú Olo” veta politikamente dekretu-lei protesaun sivíl tanba kestiona asuntu sira liga ba deklarasaun kalamidade públika no asepeitu iha restrisaun direitu, liberdade no garantia.

Prezidente Repúblika konsidera testu hosi dekretu-lei ne’e tenke pondera ho adekuada, loloos no di’ak no konsisténsia ho lei sira seluk. Xefe Estadu mós konsidera iha situasaun alerta, kontijénsia no kalamidade públika iha dekretu-lei ne’e la sufisiente.

Ho razaun sira hosi Xefe Estadu, Sekretária Meza Parlamentu Nasionál, fó-sai katak semana oin sei halo apresiasaun ba Lei Protesaun Sivíl ne’e.

Maibé antes ne’e mós, Prezidente Komisaun B (Negósiu Estranjeitu, Defeza no Seguransa), Deputadu Agustinho Siqueira “Somoxo“ hateten lei refere esbosa dezde 2010 maibé lori tempu naruk no 21 jullu 2020 mak foin aprova iha Parlamentu Nasionál.

“Atualmente Prezidente Repúblika veta no haruka fila mai Parlamentu Nasionál no parlamentu atu halo saida, ne’e iha dalan-rua katak hadi’a lei ne’e ou halo votu konfirmasaun. Tuir ha’u-nia hanoin sei liuhosi dalan votu konfirmasaun hodi haruka fila-fali ba Repúblika,“ dehan Prezidente Komisaun B ne’e.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here