Plenária Parlamentu Nasionál. Imajen Tatoli/António Gonçalves

DILI, 20 novembru 2020 (TATOLI)—Parlamentu Nasionál (PN) sei debate proposta-lei Orsamentu Jerál Estadu (OJE) 2021 iha faze jeneraliade iha loron 30 novembru, semana oin.

“Iha reuniaun líder bankada horisehik diskute kona-ba kalendáriu ajendamentu diskusaun ba orsamentu 2021 nian. Hosi reuniaun líder bankada ne’e deside diskusaun ba orsamentu jerál Estadu 2021 sei hahú iha 30 novembru no termina iha 15 dezembru,” Sekretária Meza Parlamentu Nasionál, Deputada Norberta Soares Martins, informa liuhosi konferénsia imprensa, iha sala GMPTL, Parlamentu Nasionál, sesta ne’e.

Proposta OJE 2021 hamutuk biliaun $1.895 kompostu hosi saláriu no vensimentu millaun $ 239,26, bens (sasán) no servisu millaun $421,49, transferénsia públika millaun $669,91, kapitál minór millaun $61,14 no kapitál dezenvolvimentu millaun $503,20.

Audiénsia ba proposta-lei refere termina ona iha lorom 17 novembru foin lalais ne’e no oras ne’e komisaun sira hala’o hela prosesu elaborasaun relatóriu no paresér hafoin tama ba debate jeneralidade, espesialidade no halo votasaun iha finál globál.

Rejimentu Parlamentu Nasionál (RPN) artigu 105 (Inísiu diskusaun), alínea 1 hateten diskusaun iha jeneralidade foka ba prinsípiu no sistema projetu ka proposta-lei idak-idak nian.

Nune’e mós RPN artigu 106 (prazu mínimu molok debate iha jeneralidade) hatutan, projetu ka proposta-lei labele debate iha jeneralidade molok liu prazu loron hitu, sura hahú hosi data admisaun.

Entretantu RPN artigu 108 (diskusaun no votasaun iha espesialidade) alínea 1 subliña, diskusaun no votasaun iha espesialidade ba matéria ne’ebé temi iha no.2 no 3 hosi artigu 95 Konstituisaun nian hala’o iha Plenáriu.

Iha RPN 109 fundamenta, diskusaun espesialidade foka ba artigu idak-idak no sei laiha diskusaun iha espesialidade ba artigu ida, se la aprezenta proposta alterasaun ruma kona-ba artigu ne’e. votasaun iha faze diskusaun espesialidade ne’e sei foka artigu ida-idak.

Iha RPN artigu 111 (votasaun finál globál) alínea 1 akresenta, ramata tiha votasaun iha espesialidade iha Plenáriu, halo kedas votasaun finál global.

Alínea 2 hosi artigu 111 ne’e hateten, wainhira aprova ona iha espesialidade iha komisaun, haruka textu ba Plenáriu hodi halo votasaun finál globál.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here