Seremónia inaugura sukursál foun BNCTL iha RAEOA, sesta (20/11). Imajen TATOLI/Antónia Gusmão

OÉ-CUSSE, 20 novembru 2020 (TATOLI)–Ministru Koordenadór Asuntu Ekonómiku (MKAE), Joaquim Amaral, ofisialmente inaugura sukursál foun Banku Nasionál Komérsiu Timor-Leste (BNCTL, sigla portugés) iha Rejiaun Administrativa Espesiál Oé-cusse Ambeno (RAEOA).

Ministru Joaquim apresia tebes ho esforsu BNCTL tanba hatudu progresu ne’ebé estraórdinariu iha situasaun ekonomia difísil, ho prezensa vizivél tebes iha tinan 2020 ne’ebé konsege loke sukurál tolu (Ainaro, Ermera, no RAEOA).

“Dezeju BNCTL bele serví públiku ho di’ak, relasiona ho krítiku husi kliente sira kona-ba atendimentu, ema halo krítika tanba hadomi ita, tanba ne’e hanesan banku Estadu, kontinua serbisu hamutuk Governu iha RAEOA atu nune’e suporta no  presta servisu di’ak liu no besik liután ba komunidade,” Ministru hateten iha seremónia inaugurasaun, iha Oé-cusse, sesta ne’e.

Aleinde ne’e, BNCTL hadi’a ninia-an fasilidade infraestrutura no modernu sira ne’ebé hanesan ATM P24 no infaestrutura modernu seluk tan.

“Banku ne’e eziste durante tinan barak, pasu ba pasu sempre hadi’a an no tau an hanesan ho ona banku komersiál seluk iha ita-nia rain,” nia akresenta.

Nu’udar asionista Governu, BNCTL kompromete katak ezekutivu sira kontinua tau-matan tanba banku ne’e úniku banku komersiál Estadu, tanba ne’e kontinua kapitalizasaun hanesan reprezenta apoiu Estadu tanba la’ós halo de’it servisu komersiál maibé halo mós programa sosiál Governu.

Iha fatin hanesan, Prezidente Konsellu Administrasaun BNCTL, António Víctor, hateten kondisaun edifísiu sukursál RAEOA antigu ne’e ladún di’ak hodi presta servisu públiku iha rejiaun espesiál ne’e, tanba ne’e deside halo konstrusaun edifísiu foun.

“Ho edifísiu foun, fasilidade di’ak sira ne’e mellora situasaun ekonomia no kontribui ba dezenvolvimentu Timór nian. Espera bele presta atendimentu dignu ba Oé-cusse oan sira,” António Víctor dehan.

BNCTL inaugura sukursál foun iha RAEOA, sesta (20/11). Imajen TATOLI/Antónia Gusmão

Konstrusaun sukursál foun ne’e konklui iha tinan-rua nia laran ho totál investimentu $662.000, ne’ebé ezekuta husi empreza Bobolait.

Iha ámbitu inaugurasaun ne’e, Banku Komérsiu entrega mós sertifikadu apresiasaun ba empreza Bobolait ne’ebé mak ezekuta ona obra ne’e ho di’ak no kualidade tuir kontratu ne’ebé estabelese entre parte rua.

Hafoin atividade ne’e, dirijente banku hamutuk ho MKAE no autoridade RAEOA entrega kartaun ATM P24 ba kliente tolu.

Seremónia ne’e partisipa husi Prezidente Autoridade RAEOA, Arsénio Paixão Bano, dirijente Banku, Vise Governadora Banco Central de Timor-Leste (BCTL), Nur-Aini Alkatiri, reprezentante igreja, reprezentante Polísia Nasionál Timor-Leste (PNTL) Oé-cusse, reprezentante FALINTIL-Forsa Defeza Timor-Leste (F-FDTL), parseiru BNCTL, reprezentante konsuladu Indonézia iha Timor-Leste, reprezentante mikro finanseira sira no entidade seluk tan.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here