Prezépiu Natal/Imajen foti husi Google

DILI, 20 novembru 2020 (TATOLI)- Komandu Polísia Munisípiu Dili bolu atensaun ba grupu juventude-sira iha bairru-sira iha kapitál Dili atu harii prezépiu Natal tenke ho distánsia metru 10 hosi estrada.

Segundu Komandante PNTL Munisípiu Dili, Superintendente Euclides Belo. Imajen Tatoli/Eugénio Pereira

Segundu Komandante PNTL Munisípiu Dili, Superintendente, Euclides Belo, dehan harii prezépiu dook hosi estrada públiku hodi evita engarrafamentu iha estrada públiku inklui evita problema.

“Apela ba joven sira hotu, labele halo prezépiu okupa estrada, inklui fatin pasadeira. Kuandu halo prezépiu mak okupa estrada públiku, PNTL sei halo atuasaun,” Euclides Belo hateten ba jornalista, ohin, iha Komandu PNTL, Caicoli, Dili.

Komandu PNTL Dili mós aviza ona ba Ofisiál Polísia Suku (OPS) ho Konsellu Polisiamentu Komunitáriu (KPK) hodi halo koordenasaun ho grupu juventude-sira iha kada bairru hodi koopera orientasaun ne’e.

Polísia mós bandu atu joven-sira harii tiha prezépiu labele lori tua hemu iha prezépiu oin no la bele toka múzika barullu.

Operasaun ba fogete

Iha parte seluk, PNTL Dili sei halo operasaun ba negosiante-sira ne’ebé fa’an fogete ilegál hodi rekolla ka halo apreensaun.

Nia husu ba públiku bainhira haree ema ruma sunu fogete ilegál no sunu arbiru iha fatin públiku hodi halo barullu hato’o informasaun ba polísia hodi halo atuasaun.

“Ita tenke simu festa Natál no tinan foun 2021 ho sivilizadu hodi promove Dili sai fatin paz,” Euclides Belo tenik.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here