Produtu Cesta Bázika. Imajen Tatoli/Antónia Gusmão

OÉ-CUSSE, 20 novembru 2020 (TATOLI)—Governu sentrál prevee millaun $4 ba implementasaun programa nasionál Cesta Bázika iha Rejiaun Administrativa Espesiál Oé-cusse Ambeno (RAEOA).

“Semana kotuk ha’u ho Ministru Koordenadór Asuntu Ekonómiku asina akordu rekuperasaun ekonómika ba implementasaun Cesta Bázika ho valór hamutuk millaun $4, ne’ebé husi totál ne’e millaun $3-resin sei sirkula iha Oé-cusse,” Prezidente Autoridade RAEOA, Arsénio Paixão Bano, hateten bainhira partisipa iha seremónia inaugurasaun sukursál Banku Nasionál Komérsiu Timor-Leste (BNCTL, sigla portugés) iha RAEOA, sesta ne’e.

Orsamentu ne’ebé prevee, autoridade sei serbisu hamutuk ho emprezáriu hodi sosa produtu lokál.

“Ami sei serbisu hamutuk ho emprezáriu lokál, atu haree konsege sosa produtu iha Oé-cusse rasik, maibé atu hetan produtu lokál iha ne’e la fásil, tanba ne’e sasán barak sei mai husi Dili,” nia tenik.

Millaun $4 ba programa rekuperasaun ekonómika RAEOA ne’e ba populasaun hamutuk 72.000.

Iha fatin hanesan, Ministru Koordenadór Asuntu Ekonómiku, Joaquim Amaral, husu ba autoridade atu verifika lista benefisiáriu ba programa ne’e.

“Husu ajuda autoridade lokál sira iha RAEOA, kuandu ita-nia komunidade sira ba simu sasán tenke verifika no husu sira aprezenta fixa família ne’e presiza verifika hodi evita naran doubru. Ho ida-ne’e maka bele ajuda implementa programa ho di’ak, tanba sasán sei fahe ba ema hotu no hein hotu-hotu bele fó informasaun loloos hodi simu produtu,” nia akresenta.

Programa cesta bázika fixa membru idaidak agregadu familiár sei hetan $25, kada fulan iha fulan rua nia laran.

Governu implementa medida haat ho kustu totál millaun $113,4, ba kurtu prazu hanaran mitigasaun impaktu ekonómiku no sosiál ba krize COVID-19, ho objetivu esensiál atu haree ba postu traballu ezistente antes krize no rekupera rendimentu família liuhosi hadi’a empregu no apoiu direitu sidadaun no empreza iha merkadu inklui normaliza hikas atividade ekonómika.

Husi medida haat ne’e, inklui hotu Cesta Bázika ba família, ho totál kustu ba implementasaun hamutuk millaun $71,5 (valór bele iha mudansa) ho objetivu atu fó apoiu ba nesesidade bázika família, kombate hamlaha ba família vulnerável liu, apoiu ba agrikultór, produtór no komersiante lokál.

Jornalista: Antónia Gusmão

Editora: Julia Chatarina  

HAKEREK NO HATÁN

Please enter your comment!
Please enter your name here