Ministru Prezidénsia Konsellu Ministru, Fidelis Manuel Leite Magalhães. Imajen TATOLI/Egas Cristovão

DILI, 20 novembru 2020 (TATOLI)—Iha reuniaun Konsellu Ministru (KM), ezekutivu sira aprova projetu dekretu-lei ne’ebé kria Institutu Nasionál Kombate HIV-SIDA, Institutu Públiku no aprova estatutu.

Lejizlasaun ne’e aprezenta husi Vise-Primeira-Ministra no Ministra Solidariedade Sosiál no Inkluzaun, Armanda Berta dos Santos.

“Ho aprovasaun projetu dekretu-lei ne’e, Governu hakarak define ho forma natureza jurídika klaru instituisaun prevensaun no kombate ba HIV-SIDA ida-ne’e,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun KM, sesta ne’e, iha Palásiu Governu.

Governu konsidera HIV-SIDA ne’ebé hanesan ameasa reál ba sosiedade hotu iha mundu inklui Timor-Leste.

Tanba ne’e, objetivu diploma ne’e atu halo di’ak institutu sai efesiente no organizadu inklui membru Governu tutela  bele halo kontrolu di’ak liután.

Aleinde ne’e, ezekutivu sira hakarak halo estrutura simples no funsionál, maibé garante simultánea reprezenta departamentu governamentál no organizasaun sosiedade sivíl relevante sira iha kombate HIV-SIDA.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here