Imajen TATOLI/Osória Marques.

ERMERA, 19 novembru 2020 (TATOLI)--Prezidente Republika, Francisco Guterres Lú Olo, hala’o diálogu aberta dahuluk ho populasaun sira iha Munisípiu Ermera ne’ebé ho tópiku “Ho Dialogu Sei Hetan Solusaun Ba Problema Ne’ebé De’it”.

Prezidente Repúblika Francisco Guterres ‘Lú Olo’ hateten, nia sente haksolok tebes tanba ohin bele hamutuk ho komunidade sira iha Munisípiu Ermera hodi halo diálogu no bele rona povu nia lian.

Notísia Relevante: Populasaun Ermera simu PR Lú Olo nia komitiva ho entusiazmu

“Dala uluk lha’u hakarak manifesta haksolok boot, tanba ohin hamutuk ho ha’u atu ita bele halo diálogu ne’e. Ha’u hahú kampaña mai iha munisípiu ne’e duni. Munisipiu ne’e loke odamatan hodi tara tais ba kandidatu prezidente ida naran Lú Olo, hodi fo surik meik ida, kaibauk kesi iha ulun, morten tara ba nia kakorok, hodi imi hotu hateten katak ami sei hakarak ita-boot nuudar Prezidente ba povu tomak. Afirmasaun ne’e hotu lori ha’u sai duni PR ba povu tomak,” Prezidente Repúblika, Francisco Guterres ‘Lú Olo’, hato’o iha ninia diskursu liuhosis diálogu aberta ne’ebé hala’o iha salaun Parókia Igreja Nossa Senhora de Grasa Munisípiu Ermera, Parokia Gleno, kinta ne’e.

PR Lú Olo hatutan, dialogu ohin ne’e halo ho kontekstu dialogu aberta ho povu tomak no diferensa kontekstu ida kontaktu eleitorál la hanesan, la’ós mós atu mai halo fiskalizasaun ka atu hola medida ruma kona-ba autoridade no komunidade sira halo. Maibé, nia dehan, ida-ne’e hatudu katak PR hakarak rona direta saida mak povu sira sente no sente duni.

Komunidade Munisipiu ErmeImajen TATOLI/Osória Marques.

“Ha’u lori membru Governu sira, la’ós atu manda sira, maibé atu koopera ho sira. Iha nível nasionál, tuir knaar idak-idak nian. Ha’u hakarak loke diálogu ne’e kontekstu tolu. Ida, agradese ba autoriedade Munisípiu Ermera ba organiza dialogu ne’e. Sgundu, agradese ba populasaun sira hola parte iha dialogu. Ida seluk, mak dezafiu Estadu nian hodi reafirma Estadu nian, ikus liu mak situasaun ekonomia ermera nian,” nia hateten. 

Iha Fatin Hanesan, Xefe Casa Sivil, Francisco Maria de Vasconcelos hatutan, objetivu hosi vizita ida-nee mak Prezidente Repúblika mós hakarak rona no hato’o liafuan ruma hosi komunidade sira, oinsá atu dezenvolve munisípiu ba oin no promove kultura atu dezenvolve ba oin.

Nia dehan, diálogu ne’e mós atu promove kompromísiu Governu nian hosi Governu nian kona-ba “Ema Ida, Kuda Ai-oan ida” inklui promove ortikultura iha Munisípu Ermera.

Prezidententu, Autoridade Munisípiu Ermera, José Martinho dos Santos, ohin, lori povu Ermera nia naran hato’o agradese no bem-vindu ba Prezidente Repúblika ho komitiva tomak ne’ebé mak mai hamutuk ho komunidade hodi halo dialogu aberta refere.

“Ha’u lori komunidade Ermera nia naran hato’o agradesimentu no bemvindu ba Prezidente Repúblika ho espoza no komitiva ne’ebé mak mai vizita ona Munisípiu Ermera durante loron tolu,” nia hateten.

Prezidente Autoridade Ermera ne’e informa, iha Munisípiu Ermera hamutuk suku 52 no aldeia 296 no ho nia totál populasaun hamutuk 140.000.

Nia informa ba Prezidente hodi hateten, ohin loron ne’e produsaun kafe menus tebes. Nia dehan, komunidade Ermera iha preokupasaun boot ba produsaun kafe, ne’ebé hanesan kualidade di’ak liu iha mundu tuir peritu hosi Amérika ida katak kafe Ermera kualidade númeru ida iha Mundu.

“Ho Vizita PR nian ami hakarak hato’o hela preokupasaun ba aman ba nasaun. Ami hein ita-boot nia lian hatutan ba Governu kona-ba preokupasaun kona-ba kafe nia folin kilgrama ida (1) ho folin sentavus 35 de’it ne’e,” nia dehan.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here