Eis Ministru Finansa VII Governu Konstitusionál no Prezidente Komisaun ba Elaborasaun Planu Rekuperasaun Ekonómika, Rui Gomes. Imajen TATOLI/Egas Cristovão

DILI, 18 novembru 2020 (TATOLI)—Ekonomista timor-oan, Rui Gomes, halo enkontru ho Primeiru-Ministru (PM), Taur Matan Ruak, hodi hato’o ninia prontidaun asume kargu Ministru Finansa hodi subtitui Fernando Hanjam.

“Ha’u mai enkontru ho Primeiru-Ministru hodi ko’alia kona-ba seremónia simu pose iha segunda oin, tanba infelizmente ita-nia atuál Ministru Finansa, Fernando Hanjam tanba saúde, nia la konsege kontinua knaar,” Rui Gomes hateten hafoin sorumutuk ho Xefe Governu, iha Pálasiu Governu, kuarta ne’e.

Notísia Relevante: Segunda oin, Rui Gomes simu pose ba kargu Ministru Finansa

Tuir Ekonomista ne’e, atu asume kargu importante ne’e hetan konfiasa hosi Primeriu-Ministru, Prezidente Republika, Francisco Guterres ‘Lú Olo’ no Sekretáriu Jerál Partido FRETILIN, Marí Alkatiri.

“Sira eskolla ha’u asume kargu Ministru Finansa no ha’u prontu tanba ba país no povu ida-ne’e nia ekonomia ita tenke prontu,” nia afirma.

Antes ne’e, xefe Governu konfirma ona Rui Gomes atu subtitui Fernando Hanjam asume kargu Ministru Finansa iha VIII Governu Konstitusionál.

Fernando Hanjam nia kondisaun saúde la primite atu kontinua kargu ezekutivu ne’e, tanba nia presiza deskansa.

Rui Gomes hanesan Ekonomista ne’ebé lidera ona ekipa Programa Rekuperasuan Ekonómika ba mandatu loron-100.

Aleinde ne’e, nia mós nu’udar Ministru Finansa iha VII Governu Konstitusionál no atualmente hanesan asesór iha Prezidénsia Repúblika.

Fernando Hanjam simu pose iha loron 24 juñu 2020 hosi Prezidente Repúblika, ne’ebé konsege hala’o knaar to’o agostu tinan ne’e.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here