Kulat nia matéria prima mak hanesan ai-samatuku uut, haree uut no ahu mama no matéria prima sira-ne'e kahor hotu hafoin ense ba plástiku no kesi borraxa hafoin tau iha bidon durante oras 6-8 nia laran pois ba hatama fali iha fatin produsaun nian. Imajen TATOLI/Osória Marques.

GLENO, 18 novembru 2020 (TATOLI)–Koordendór Produsaun Ai-Kulat, Cornélio Gago, hateten rekursu agrikultór Fatukeru potensiál tebes ho produsaun ai-kulat.

“Agrikultór Fatukeru potensiál ho ai-kulat tanba uluk ha’u-nia maun Prezidente Repúblika iha ai-laran karik buat ne’e moris iha ai-laran maibé agora ami lori kulat mai moris iha sidade,” Cornélio Gago hateten ba jornalista sira bainhira Prezidente Repúblika Francisco Guterres ‘Lú-oló ho nia espoza Cidália Mouzinho Nobre no membru VIII Governu hala’o vizita iha Suku Fatukeru, Postu Administrativu Railaco, Munisípiu Ermera, kuarta ne’e. 

Cornélio Gago esplika, prosesu halo matéria prima ba ai-kulat ne’e mak presiza tempu naruk hodi bele hetan nia rezultadu di’ak no bele fó benefisía.

“Oinsá ita hamoris kulat ne’e nia matéria prima hanesan aisamatuku uut, haree uut no ahu mama. Matéria prima sira-ne’e kahor hotu no ho nia durasaun oras 24 nia laran,” nia dehan.

Nia haktuir, hafoin ense ba plástiku no kesi borraxa hafoin tau iha bidon durante oras 6-8 nia laran. Nune’e, nia dehan, naimhira hasai no tau iha sala izolamentu durante oras 24 nia laran no tau fini ne’e iha nia fatin durante loron 30 nia laran.

Nia hateten, bainhira haree kamutis ona mak lori fali ba sala produsaun no hein prosesu loron hitu (7) to’o loron 14 nia laran entaun kulat ne’e komesa moris ona hafoin kolleta.

“Hotu tiha, ita kolleta no fó ba komsumidór ka kliente sira ne’ebé presiza tebes liuliu iha sidade Dili,” Koordendór ne’e hateten.

Nia dehan, aí-kulat lori ba Dili semana ida dala tolu tanba ai-kulat nia komparasaun ho naan, kulat di’ak liu. Ho produsaun ai-kulat ne’e, nia dehan, prezensa Ministériu Saúde (MS) no Ministériu Edukasaun juventude no Desportu (MEJD) bele involve ba atividade merenda eskolar ka programa má-nutrisaun nian.

“Tanba ita bele halo ba uut hodi fó ba labarik sira ne’ebé mak ho idade fulan neen (6) tanba proteína iha kulat ne’e ho grama 100 no 21% kompara ho naan karau 0.3% de’it,” Cornélio Gago hateten.

Nia dehan, ai-kulat laiha mina no di’ak ba saúde no ba ema ne’ebé mak sofre kolestrol no kankru, di’ak liu konsumu ida-ne’e no dalabarak uza ba programa dieta.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here