Produtu Cesta Bázika. Imajen Tatoli/Antónia Gusmão

DILI, 17 novembru 2020 (TATOLI)—Primeiru-Ministru (PM), Taur Matan Ruak, rekoñese programa Cesta Bázika ne’e la’ós fásil, tanba nu’udar programa boot ne’ebé sei implementa iha tempu badak nia laran, ne’ebé presiza envolve entidade barak ho suporta hosi ema hotu atubele la’o ho susesu.

“Programa ne’e foin ba dahuluk, tanba ne’e todan no presiza ema hotu serbisu hamutuk atu susesu tanba la hanesan  projetu ida uluk tranférensia osan cash (totál $200) ba kada uma-kain, maibé agora ne’e ba kada ema,” PM Taur hateten iha Palásiu Prezidensiál, Bairro Pité, tersa ne’e.

Planu rekuperasaun ekonómika iha ámbitu COVID-19 ba kurtu prazu, Governu dezeña medida haat ne’ebé implementa hahú jullu to’o dezembru 2020.

Entre medida hirak ne’e inklui ona ho Cesta Bázika, ne’ebé ninia preparasaun hahú fulan-setembru tinan ne’e hanesan projetu pilotu no atividade distribuisaun hahú novembru kobre territóriu tomak.

“Dadus populasaun Timor-Leste iha millaun 1,3, maibé tuir informasaun agora sa’e ba millaun 1,5, portantu ne’e la’ós prosesu ida kama’an no presiza envole ema hotu,” nia hatutan.

Biban ne’e, Xefe Governu rejeita informasaun ne’ebé dehan programa ne’e partidu balun ninia, tanba partikularmente Cesta Bázika dezeña hosi VIII Governu Konstitusionál hanesan polítika rekuperasaun ekonómika iha ámbitu surtu globál, hanesan rekomendasaun hosi ekipa Elaborasaun Planu Rekuperasaun Ekonómika, lidera hosi Rui Gomes ho mandatu loron-100.

“Programa ne’e envolve Minstériu Agrikultura no Peska, Sekretaria Estadu Ambiente no seluk  tan inklui setór privadu, ne’ebé prátikamente Governu envolve sira ne’ebé iha área relasaun ho ida-ne’e,” nia akresenta.

Antes ne’e, Ministru Koordenadór Asuntu Ekonómiku, Joaquim Amaral, rekoñese kondisaun lojístika nasionál ladún permite, maibé Governu sei uza meiu hotu atu populasaun tomak bele hetan direitu ba programa Governu.

Totál orsamentu ne’ebé aprova iha Orsamentu Jerál Estadu (OJE) 2020 ba Cesta Bázika hamutuk millaun $71,5, maibé montante ne’e sei iha mudansa bazeia ba totál populasaun.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here