Ministru Petróleu no Minerál, Víctor da Conceição Soares. Imajen Tatoli/Egas Cristovão

DILI, 17 novembru 2020 (TATOLI)—Ministériu Petróleu no Minerál (MPM) lideradu Víctor da Conceição Soares, prioritiza rekursu petrolíferu no promove governasaun di’ak ne’ebé korresponde ho montante millaun $85,5 ba tinan fiskál 2021.

Ministériu Petróleu no Minerál nu’udar departamentu governamentál ne’ebé responsável ba konsesaun no ezekusaun polítika enerjétika no jestaun rekursu minerá, inklui petróleu no minériu estratéjiku sira. Nune’e mós fó lisensiamentu no regulasaun ba atividade estrativa, atividade industriál ba benefisiasaun petróleu no minerál inklui mós petrokímika no refinasaun bazeia ba artigu 1º Dekretu-Lei n.º 15/2018, 12 dezembru).

“Ami iha programa rua mak hanesan jere rekursu petrolíferu no promove boa governasaun iha tinan fiskál 2021,” Ministru Petrolífetu no Minerál, Víctor da Conceição Soares, esplika liuhosi audiénsia públika ho Komisaun C (Finansa Públika) no Komisaun D (Ekonomia no Dezenvolvimentu) iha plenária Parlamentu Nasionál, tersa ne’e.

Medida prinsipál setoriál hosi MPM ba tinan fiskál 2020 ba tinan 2021 mak kontinua jere rekursu petrolíferu no minerál.

Hosi medida prinsipál dahuluk ne’e kontinua jere rekursu petrolíferu no minerál nomeadamente: implementa projetu Tasi Mane, promove kapasitasaun ba komunidade iha munisípiu ne’ebé impaktu direta iha projetu ne’e, kapasita rekursu umanu iha setór petrolíferu liuhosi atribuisaun bolsa estudu, dezenvolve mekanizmu ba utilizasaun gás naturál iha atividade ekonómika nasaun nian no masimizasaun investimentu iha setór petrolíferu no mineiru liuhosi estudu, peskiza iha nasaun seluk.

Nune’e mós sei Garante Inisiativa Transparénsia Indústria Estrativa sira (ITIE), asegura sinerjia, kooperasaun internasionál, iha ámbitu ba setór rekursu enerjétiku, kontinua peskiza no dezenvolvimentu petróleu, gás, Terrestre, marítimu, dezenvolvimentu ba lejizlasaun adisionál, regulamentasaun vokasiona ba jestaun efisiente no transparente atividade sira hotu no esplorasaun rekursu petrolíferu no minerál.

Medida prinsipál daruak hosi MPM sei promove governasaun di’ak no jestaun institusionál iha Ministériu no servisu sira-ne’ebé dependente, fortalese instituisaun no eleva kapasidade rekursu umanu.

Ho programa prinsipál rua ne’e, Ministériu Petróleu no Minerál (MPM) propoin $85,573,288 ba tinan fiskál 2021, ne’ebé koloka ba saláriu no vensimentu $431,202, bens no servisu $1,082,025, kapitál minór $412,210 no transferénsia públika $83,647,851.

Programa ho kódigu 401 kona-ba jestaun rekursu petrolíferu no minerál sei gasta  $84,203,349 no programa ho kógigu 510 kona-ba governasaun di’ak no jestaun institusionál sei gasta $1,369,939.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here