TDD. Imajen Tatoli /Dok

DILI, 17  novembru 2020 (TATOLI)-Eis Sekretáriu Estadu ba Formasaun Profisionál no Empregu (SEFOPE), Bendito dos Santos Freitas, hamutuk ho nia diretor kompañia privadu (unipessoal) na’in-12   sai arguidu ba Tribunál tanba deskonfia hamosu infrasaun iha adjudikasaun direta ba projetu demolisaun uma Estadu iha tinan 2010.

Iha tempu mandatu Bendito dos Santos Freitas nian nu’udar Sekretáriu Estadu SEFOPE, parte sira hola desizaun adjudikasaun direta ba projetu demolisaun uma Estadu ne’ebé la kumpre ba Lei Aprovizionamentu  hodi fó prejuizu ba Estadu ho montante global $377,069,46.

Prosesu ne’e Ministériu Públiku (MP) notifika arguidu na’in-14 hanesan eis Sekretáriu Estadu Bendito dos Santos Freitas, no arguidu sira ho inisiál JMDCS, AXC, ADFVX, JDM, NJ, MDCP, VDCDC, JDC, RMDP, CPC mcp,  FDCS mep, HAT, MT.

Autos ne’ebé arrola  hosi Ministériu Públiku  katak  arguidu-sira ne’e balun funsionáriu SEFOPE no maioria  diretór kompañia privadu (Unipesoal) lubuk ida ne’ebé SEFOPE halo adjudikasaun direita ba projetu demolisaun uma Estadu.

MP akuza arguidu sira ho krime partisipasaun ekonomia no negósiu previstu iha artigu. 299 n 2, agravadu  hosi artigu 301, krime falsifikasaun dokumentu públiku  iha artigu 305, krime burla agravadu previstu iha artigu 267 n., 1 alínea A) hotu-hotu iha kódigu penal.

Tuir loos audiénsia julgamentu, ohin, iha Tribunál Distritál Dili (TDD) atu rona deklarasaun arguidu-sira nian, maibé  arguidu ida  la marka prezensa  tanba ne’e labele realiza. Nune’e, Tribunál deside adia fila-fali julgamentu ne’e ba iha loron 5 janeiru 2021 iha tuku 9:00 Otl to’o lokraik, hodi aselera prosesu julgamentu, tanba prosesu ne’e adia ona ba dala tolu.

Tuir akuzasaun MP nian dehan, iha indísiu sufisiente, hateten katak, arguidu Bendito dos Santos Freitas, iha tinan 2010 asume kargu hanesan Sekretáriu Estadu SEFOPE.

Iha autos ne’ebé arrola hosi MP fó sai katak arguidu JMDCS, iha fulan novembru tinan 2003 servisu iha SEFOPE iha tinan 2007 no asume kargu hanesan Diretór Nasionál Empregu. Arguidu AXC serbisu iha SEPFOPE hahú iha fulan agostu tinan 2007 to’o agostu 2011, asume kargu hanesan Xefe Gabinete ba Sekretáriu Estadu SEFOPE.

Iha nia planu anuál SEFOPE uza “fundus transferénsia públika”, alokadu iha Diresaun Nasionál Empregu, atu harahun ou demolisaun uma Estadu ne’ebé hetan estragu iha tinan 1999 no tinan 2006.

Serbisu refere tuir planu atu entrega ba komunidade iha area rurais hodi implementa servisu no tuir planu Governu sei halo pagamentu loron ida ho valór $3,00  ba traballadór lokál.

Fundu transferénsia públika ho montante $1,389,167.17 prepara hodi implementa planu demolisaun ba edifísiu Estadu nian ho diskrisaun iha BoQ hanesan: clearing/hamoos, pika kuluna ho sinta, baku rahun uma-laran, kee rai simente-sira ne’ebé aterru no mós tula ba karreta hodi ba soe, kada item iha leten indika iha BoQ no iha kustu ba kada munisípiu ho montante $1,389, 967.17.

Iha loron 22 fulan setembru  2010, arguidu Bendito dos Santos Freitas,  altura sei asume kargu hanesan Sekretáriu Estadu SEFOPE, ho orsamentu “fundus transferénsia públika”, deside hodi adjudika direita ba kompañia projetu (mão de obra) no  deside hodi asina kontratu ho kompañia sira hanesan;

  • Lian Forte Unipessoal Lda,
  • Hfoun Unipessoal Lda,
  • Maun Alin Suai Unipessoal Lda,
  • Novo Colega Unipessoal Lda,
  • Erupari Constructional Unipessoal Lda,
  • Risa Unipessoal Lda,
  • Riva Unipessoal,
  • Caimaleloqui Unipessoal Lda,
  • Matata Construction Unipessoal Lda,
  • Metalic Construction Lda,
  • Cojoscar Costruction Unipessoal Lda,
  • Richi Unipessoal Lda

Kompañia hirak ne’e implementa planu demolisaun iha munisípiu sira hafoin asina kontratu refere iha loron 04 fulan outubru 2010, arguidu Bendito dos Santos Freitas, JMCS, foin commit no mós aprova CPV kona-ba projetu “demolition of dilapidated govermeent buldings programe” iha munisípiu  13 ho montante osan ba kada munisípiu hanesan tuir mai;

Arguidu Bendito dos Santos Freitas adjudika direita primeiru hosi Munisípiu Ermera ho montante $138, 297.11 ba empreza Matata, tuir  hosi Munisípiu Liquiça $37, 996.43 ba empreza Metalika Costruction Lda.

Iha Munisípiu Bobonaro $208, 228.82 ba empreza Hfoun Unipesoal Lda, Munisípiu Viqueque $26,031.21 ba empreza Riva Unipesoal Lda, Munisípiu Manatuto $417, 417.07 ba empreza Risa Unipessoal Lda, Munisípiu Baucau $69,677.60 ba empreza Caimaleloqui Unipesoal Lda.

Munisípiu Covalima $65,021.60  ba empreza Maun Alin Suai Unipessoal Lda, Munisípiu Lautem $40,683.23 ba empreza Erupari Unipesoal Lda, Munisípiu Ainaro $39, 228.86 ba empreza Richi Unipesoal Lda, Munisípiu Oe-Cusse atuál Rejiaun Administrativu Espesiál Oe-Cusse Ambeno (RAEOA) $87, 500.00   ba empreza Grand Enclave Unipesoal Lda.

Munisípiu Dili $ 95, 743.27 ba empreza Lian Forte Unipesoal Lda, Munisípiu Aileu $118, 101.91 ba empreza Cojoscar Unipesoal Lda, Munisípiu Manufahi $50, 956 01 ba Novo Colega Unipesoal Lda.

Iha loron 11 outubru 2011, arguidu Bendito dos Santos Freitas mós deside hodi adjudika direita projetu demolisaun no mós deside hodi asina kontratu ho kompañia Grand Enclave Unipessoal Lda, hodi implementa planu demolisaun iha Munisípiu  Manatutu ho Oe-Cusse.

Iha akuzasaun MP nian ne’e hateten, arguidu sira foin maka aprova/commit CPV iha loron 4 outubru 2010, mas tamba kontratu asina balu iha loron 22 setembru 2010 no balu asina ikus iha loron 11 outubru 2011, maibé realidade kompañia sira pagamentu ba 50%.

Kompañia Matata Unipessaol Lda, aprezenta pedidu pagamentu iha loron 07 outubru 2010, kompañia Metalica Construction Lda, aprezenta pedidu pagamentu iha loron 04 outubru 2010, kompañia Risa Unipessaol Lda, aprezenta pedidu pagamentu iha loron 13 outubru 2010, kompañia Caimaleloqui Unipessaol Lda aprezenta pedidu pagamentu iha loron 29 setembru 2010.

Kompañia Maun Alin Suai Unipessaol Lda aprezenta pedidu pagamentu iha loron 04 outubru 2010, kompañia Erupari Costruction Unipessaol Lda, aprezenta pedidu pagamentu iha loron 04 outubru 2010, kompañia Risci Unipessaol Lda aprezenta pedidu pagamentu iha loron 30 setembru 2010.

Kompañia Lian Forte Unipessaol Lda aprezenta pedidu pagamentu iha loron 04  outubru 2010, kompañia Cojoscar Construction Unipessoal Lda aprezenta pedidu pagamentu iha loron 30 setembru 2010, kompañia Novo Colge Unipessoal Lda aprezenta pedidu pagamentu iha loron 30 setembru  tinan 2010.

Kontratu iha leten asina hosi arguidu Bendito dos Santos Freitas ho empreza sira hodi implementa projetu demolisaun no la tuir ona planu inísiu katak entrega ba komunidade área rurais ka programa (mão de obra).

Mezmu eziste inválidu iha sertidaun dívida ne’ebé maka aprezenta hosi kompañia Hfoun Unipessaol Lda, Grand Enclave Unipessaol Lda, mas arguidu-sira nafatin adjudika kontratu ba projetu demolisaun ba kompañia refere.

Arguidu Bendito dos Santos Freitas hamutuk ho JMCS entrega projetu demolisaun ba empreza sira identifikadu iha leten, Aprovizionamentu no Finansa SEFOPE laiha koñesimentu ba konkursu no kontratu ne’ebé arguidu asina tiha ona.

Ministériu Finansa Sentrál, rejeita no lakohi atu prosesa pagamentu ba kompañia-sira ne’ebé maka implementa tiha ona projetu demolisaun, tamba razaun projetu demolisaun la tuir prosesu aprovizionamentu no laiha inspesaun finál.

Arguidu Bendito dos Santos Freitas nu’udar Sekretáriu Estadu, JMDC nu’udar nain ba projetu demolisaun, no mós JAXC nu’udar Xefe Gabinete Sekretáriu Estadu husu ba LDXC nu’udar Xefe Departamentu ba aprovizionamentu atu asina pedidu pagamentu, CPV, pedidu ba no mós relatóriu hosi ekipa téknika sira maibé LDXC rejeita tanba kontratu refere la tuir prosesu aprovizionamentu.

Iha loron 15 novembru 2010 arguidu Bendito Freitas hatun despaxu ho periodu 15 novembru to’o 31 dezembru  2010, hodi nomeia fali arguidu JMDCS  hodi troka  Xefe Departamentu Aprovizionamentu nia fatin.

Bazeia ba despaxu nomeasaun refere iha loron 18 fulan novembru 2010, funsionáriu ida  ho inisiál  JS solisita ba Diretora Finansas atu troka naran  Xefe departamentu LDXC  iha sistema aprovizionamentu no rejistu fali ba arguidu JMCS.

Hodi nune’e iha fulan dezembru 2010, arguidu JMDCS  autoriza orden ba pagamentu (PO) no arguidu BDSF fó aprovasaun ba dokumentu aprovizionamentu hodi efetua prosesu pagamentu ba kontratu demolisaun ne’ebé mak hala’o tiha ona iha munisípiu 13.

Arguidu JS kumpre despaxu nomeasaun hosi arguidu BDSF hodi aprova dokumentu aprovizionamentu mezmu nia hatene katak aprovasaun ne’ebé nia hala’o viola tiha ona prosedimentu aprovizionamentu.

Projetu demolisaun la tuir prosesu konkursu públiku  no la prienxe rekizitu ba adjudikasaun direita, mas arguidu sira kontinua entrega projetu ne’e ba kompañia-sira refere iha leten.

Arguidu JASC nu’udar xefe ba ekipa monitorizasaun ba projetu dėmolisaun aprezenta relatóriu falsu hodi dehan kompañia-sira hala’o ona demolisaun ba uma Estadu iha munisípiu 13 ho nia ezekusaun fíziku 100%, relatóriu arguidu JS dirije ba arguidu Bendito Freitas hanesan Sekretáriu Estadu no hetan aprovasaun hosi arguidu Bendito Freitas.

Iha realidade durante kompañia ne’ebé maka asina tiha ona kontratu sira la kumpre 100% projetu refere, maibé hetan tiha ona pagamentu 100% tanba falsifikasaun ba relatóriu finál fiskalizasaun no monitorizasaun no autorizasaun no mós aprovasaun hosi arguidu Bendito Freitas, JAXC no mós JMDCS hamutuk ho kompañia-sira hanesan iha Munisípiu Dili, Ermera, Liquiça, Aileu, Lautem, Manatuto , Viqueque, Baucau, Bobonaro, Covalima, Ainaro, no mós Manufahi.

Arguidu HAT nu’udar diretór kompañia Lian Forte Unipessoal Lda ne’ebé implementa projetu demolisaun iha Munisípiu Dili la kumpre 100% ezekusaun fíziku tuir kontratu, maibé hetan pagamentu  100%, konsekuénsia Estadu sofre prejuizu ho montante $32,045,84

Tuir tabela ne’ebé Arguidu ADFVX, hanesan diretór kompañia Riva Unipessoal, Lda, ne’ebé implementa projetu demolisaun iha Munisípiu Viqueque la kumpre 100% hosi kontratu, maibé hetan pagamentu  100%, konsekuénsia Estadu sofre prejuízu ho montante $6,291,57.

Arguidu JDC, hanesan diretór kompañia Maun Alin Suai Unipessoal Lda ne’ebé implementa projetu demolisaun iha Munisípiu Covalima la kumpre 100% hosi kontratu, maibé hetan pagamentu  100%, konsekuénsia Estadu sofre prejuizu ho montante  $7,385,71.

Ba arguidu  NJ, hanesan diretór kompañia H’Foun Unipessoal Lda, ne’ebé implementa projetu demolisaun iha Munisípiu Bobonaro la kumpre 100% hosi kontratu, maibé pagamentu hala’o 100%, konsekuénsia Estadu sofre prejuizu ho montante $98,471,59.

Arguidu RMDCP  hanesan diretór  kompañia Caimaleloqui Unipessoal Lda, ne’ebé implementa projetu demolisaun iha Munisípiu Baucau la kumpre 100% hosi kontratu, maibé pagamentu hala’o 100%, konsekuénsia Estadu sofre prejuizu ho montante $14, 303, 12, hanesan iha Baguia $1.874,26, ba  Venilale $648,95  no Baucau Vila $9252,43 sub-totál $14.303,12 26.

Arguidu VDCDC  hanesan Diretór Kompañia Metalica Construction Unipessoal Lda, ne’ebé implementa projetu demolisaun iha Munisípiu Liquiça la kumpre 100% hosi kontratu, maibé pagamentu hala’o 100%, konsekuénsia Estadu sofre prejuizu ho montante $3,985,55.

Arguidu FDCF hanesan Diretór Kompañia Risa Unipessoal Lda, ne’ebé implementa projetu demolisaun iha Munisípiu Manatuto la kumpre 100% husi kontratu maibé pagamentu hala’o 100%, konsekuénsia Estadu sofre prejuizu ho montante $103, 142. 30.

Arguidu JTDCP, diretór ba kompañia Mata Unipessoal Lda, implementa projetu demolisaun iha Munisípiu Ermera la kumpri 100% hosi kontratu no konsekuénsia Estadu sofre prejuízu ho montante  $24,164,96.

Arguidu MT, eis diretór kompañia Novo Colega Unipessoal Lda, ne’ebé implementa projetu demolisaun iha Munisípiu Manufahi la kumpre 100% hosi kontratu no konsekuénsia Estadu sofre prejuízu ho montante $12,642,93.

Arguidu CPC  ema ne’ebé maka no kontrolu kompañia Wenet Unipessoal Lda, ne’ebé implementa projetu demolisaun iha Munisípiu Aileu la kumpre 100% hosi kontratu no konsekuénsia Estadu sofre prejuízu ho montante  $72,632,89.

Konsekuénsia husi hahalok arguidu sira nian ho esforsu hamutuk no viola tiha prosedimentu aprovizionamentu no fim iha implementasaun la kumpre 100%, maibé aprezenta pedidu pagamentu no mós fó aprovasaun ba pedidu pagamentu hodi deklara falsu katak projetu atinje tiha ona 100% ho nune’e bele hasai osan Estadu RDTL no fó benefisia ba sira seluk, hodi hamosu prejuizu ba Estadu RDTL ho montante global $377, 069.46.

Arguidu sira koñesidu hanesan ema ne’ebé maka iha esperiénsia iha prosesu aprovizionamentu, hatene katak adjudikasaun direita la’ós prosedimentu aprovizionamentu ida atu foti hodi hala’o prosesu demolisaun ba uma Estadu nian ne’ebé maka hetan estragu iha tinan 1999 no mós tinan 2006.

Arguidu Bendito Freitas hanesan Sekretariu Estadu iha SEFOPE altura ne’ebá atu aselera prosesu pagamentu nia uza nia podér hodi nomea fali arguidu JMDCS hodi halo aprovasaun ba prosesu pagamentu ba projetu demolisaun mezmu nia hatene katak nia hahalok viola tiha ona lei aprovizionamentu.

Arguidu sira hamutuk hodi viola norma legal  husi lei aprovizionamentu. Arguidu sira mós viola prinsípiu transparénsia no publisidade no sira obriga rekizitu adjudikasaun.

Arguidu-sira serve ba sira-nia funsaun no atribuisaun hodi proposiona arguidu-sira hanesan nain ba kompañia ne’ebé asina kontratu.

Audiénsia julgamentu  ne’e prezide hosi juis koletivu, Albertina Neves, Ersilia da Silva, Afonso Carmona no  Ministériu Públiku reprezenta Prokuradora, Lidia Soares, no arguidu sira hetan asisténsia legal hosi defensór públiku na’in rua ho advogadu  privadu na’in lima.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here