Imajen ilustrasaun/foti hosi Google

DILI, 17 novembru 2020 (TATOLI)-Mane ida ho inisiál  LBB, oras ne’e, tenke toba iha sela detensaun polísia tanba uza forsa no tudik hodi hakanek nia eis namorada ho inisiál ODM.

LBB lori tudik sona nia eis namorada ODM nia ulun tanba ODM rekuza atu kontinua sira na’in-rua  nia relasaun domin.

LBB daudaun ne’e detein ona ha Sela Polísia Eskuadra Comoro, Munisípiu Dili, hodi submete ba investigasaun no prosesa tuir Lei mak vigora.

Kronolojia ne’ebé arrola hosi autoridade Polísia katak kronolojia kazu tentativa omisídiu ne’e akontese iha vítima nia kos (uma kuarta) iha Aldeia Moris Foun, Suku Comoro, Postu Administrativu Don Aleixo, Munisípiu Dili, segunda liubá, tuku 09:50 Otl.

“Suspeitu lori tudik taa kanek lezada nia ulun. Tuir informasaun, kauza tanba lezada lakohi halo kontinua relasaun domin (namora) ho suspeitu, ho nune’e maka suspeitu xateadu, foti tudik taa lezada nia ulun to’o kanek,” portavós Komandu Jerál PNTL, Superintendente Xefe, Arnaldo de Araújo, haktuir ba jornalista liuhosi konferénsia imprensa iha Komandu Jerál PNTNL, Caicoli, Dili.

Iha akontesimentu ne’e, uma na’in no populasaun sira halo kedas atuasaun hodi salva vítima ODM   no  detein kedas suspeitu hodi entrega ba Polísia Eskuadra Comoro.

Polísia lori ona vítima ba ospitál hodi hala’o tratamentu saúde no foti kedas vítima nia deklarasaun. Polísia mós kontaktu kedas vítima nia família, inklui suspeitu nia família hodi tuur hamutuk buka hakotu problema ne’e.

“Kazu ne’e PNTL sei halo investigasaun no to’o oras 72  nia laran sei aprezenta ba Ministériu Públiku,” Superintendente Xefe, Arnaldo de Araújo hateten .

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here