Komandante PNTL, Munisípiu Bobonaro, Octavio Bucar. Imajen Tatoli/Antonio Gonalves

DILI, 16 novembru 2020 (TATOLI)-Durante outubru to’o loron 15 novembru 2020, Estudante Timoroan no traballadór estranjeiru hamutuk ema na’in 534 maka hala’o viajen hosi Atambua-Indonézia tama mai Timor-Leste liuhosi fronteira terrestre Batugade.

Notísia Relevante : PNTL Bobonaro Esforsu Kombate Negósiu Ilegál

Komandante PNTL Munisípiu Bobonaro, Superintendente Xefe, Octávio de Araújo Bucar, informa maioria abitante hirak ne’e tama mai ho viajen legál ne’ebé hetan pasa revista hosi ekipa Servisu Migrasaun, Postu Batugade no hetan apoiu hosi PNTL Bobonaro hamutuk ho Unidade Patrullamentu Fronteira (UPF) no FALINTIL-Forsa Defeza Timor-Leste (F-FDTL), inklui Autoridade Aduaneira ka Alfándega.

Abitante hirak ne’e tama mai hetan pasa revista maka’as hosi ekipa COVID-19 hodi haruka sira hela iha kuarentena Batugade no Dili.

“Iha outubru, ita rejista totál ema na’in-307 no ema 291 kontinua ba kuarentena Dili no na’in 16 iha kuarentena Motain. Iha  novembru nian fali ema hamutuk 227 no 213 maka kontinua mai iha Dili no na’in 14 maka iha kuarentena Motain ne’ebé totál ema durante fulan rua ne’e na’in 534,” Superintendente Xefe, Ocatávio hateten, ohin, ba jornalista iha Sentru Formasaun Polísia, Comoro, Dili.

Nia hatutan, atu evita propagasaun COVID-19 tama mai Timor-Leste, ekipa PNTL servisu hamutuk ho ekipa Ministériu Saúde ba servisu misaun COVID-19 nian halo nafatin kontrolu maka’as iha Fronteira Bobonaro.

Komandante PNTL ne’e hatutan, to’o agora iha Bobonaro rasik seidauk rejista kazu mortalidade COVID-19.

Nia dehan, PNTL Bobonaro hamutuk ho Komandu UPF, COE, F-FDTL hala’o nafatin operasaun konjunta iha liña fronteira no kontrola nafatin regra implementasaun Estadu Emerjénsia ba da-hituk.

Jornalista: Eugénio Pereira

Editór: Francisco Simões