Komandante PNTL Munisípiu Bobonaro, Superintendente Xefe, Octávio de Araujo Bucar. Imajen/Antonio Goncalves

BOBONARO, 16 abríl 2020 (TATOLI)-Komandante Polisia Munisípiu Bobonaro, Superintendente Xefe, Octávio de Araújo Bucar, deklara nia parte kontinua esforsu hodi kombate negósiu ilegál no mós prevene sidadaun tama sai Fronteira Terrestre ho dalan ilegalmente.

Tuir nia, hosi esforsu Komandu nian ne’e mós parte ida atu prevene transmisaun pandemia globál COVID-19 hosi Indonézia mai Timor-Leste tanba sidadaun balun tenta ultrapasa fronteira ho ilegál hafoin Governu implementa Lockdown.

Antes ne’e, Komando PNTL Bobonaro koordena ona ho Unidade Polisia Fronteira, FALINTIL-Forsa Defeza Timor Leste (F-FDTL) atu asegura seguransa iha liña fronteira liliu kombate atividade ilegál.

Aleinde ne’e, nia mós fó ona orientasaun ba Komandante Eskuadra hitu iha Bobonaro liliu Ofisiál Polisiamentu Suku (OPS) hodi servisu hamutuk ho Autoridade Lokál hanesan Xefe Suku no Aldeia hodi desimina informasaun ba komunidade kona-ba implementasaun estadu emerjénsia no meiu prevensaun ba Surtu COVID-19.

Liliu oinsá kolobara ho komunidade atu servisu hamutuk ho Polisia hodi hato’o informasaun ba seguransa bainhira deteta sidadaun balun tama mai Timor-Leste ho ilegál.

“To’o agora ami seidauk rejistu kazu ema halo negósiu ilegál,” dehan, Superintendente Xefe Polisia, Octávio de Araújo Bucar, ba TATOLI, iha Komandu PNTL Bobonaro, kinta (16/04/2020).

Ho desizaun Governu nian hodi lockdown ka taka fronteira terrestre motain no fatin entrada mai Timor-Leste seluk, nia dehan Munisípiu Bobonaro sai fatin risku atu ema ultrapasa ho dalan ilegál.

Nia esplika fatin risku ba atividade Ilegál sira iha Munisípiu Bobonaro nian maka iha área Saburai, Tapo Memo, Nunura iha Postu Administrativu Maliana, Leohitu, Kova, Badut-mean iha Postu Administrativu Balibo nomos Lebos no fatin seluk tan iha Postu Administrativu Lolotoe.

Área fronteira luan ho pesoál siguransa menus, maibé nia promete sei uza rekursu ne’ebé iha ho koordenasaun UPF no F-FDTL sei asegura seguransa iha rai-laran.

Komandu PNTL Munisípiu Bobonaro, iha membru efetivu hamutuk 154, membru ne’ebé konsentra iha Komandu hamutuk ema na’in 60-resin no restu destaka ba Eskuadra polisia hamutuk hitu, hanesan Balibo, Batugade, Bobonaro,Lolotoe, Kailako, Maliana no Atabae.

“Membru sira ne’e efetivu hotu, tanba ami tama iha situasaun alerta, iha komando ne’e ami fahe ekipa servisu rua, ekipa loron no kalan,”tenik Octávio.

Jornalista  : Agapito dos Santos
Editór        : Francisco Simões

HAKEREK NO HATÁN

Please enter your comment!
Please enter your name here