BCTL garante EUA la impede transferénsia fundu petrolíferu

DILI, 16 novembru 2020 (TATOLI)—Governadór Banku Sentrál Timor-Leste (BCTL,sigla portugés), Abrãao de Vasconselos, garante Estadu Unidu Amérika (EUA) la impede pedidu transferénsia husi Banku Sentrál nu’udar jestór ba fundu petrolíferu.

“Ami laiha informasaun ruma kona-ba impedimentu halo transferénsia, tanba Governu Timor-Leste nia konta iha Banku Sentrál Timor-Leste, ne’ebé iha estranjeiru (Banku sentrál EUA), tanba ne’e laiha razaun atu labele transfere mai,” Governadór BNCTL hateten hodi hatan ba preokupasaun Xefe Bankada KHUNTO, Olinda Guterres, segunda ne’e, iha sala plenária Parlamentu Nasionál.

Deputada Bankada Governu ne’e preokupa informasaun ne’ebé espalla kona-ba konjelamentu fundu petrolíferu tanba la prienxe rekezitu.

“Banku Amérika osan povu nia, ami rona informasaun dehan labele transfere, tanba ne’e di’ak liu husu ba ita bo’ot atu esplika nune’e povu bele rona,” Deputada Olinda dehan.

Notísia Relevante: Konjelamentu FP, “Bainhira BCTL seidauk pronúnsia entaun laiha problema”

Tuir Governadór ne’e katak konta bankária BCTL mak iha Banku EUA la’ós em nome Governu, maski osan ne’e povu Timor-Leste nian.

“To’o agora ami la nota iha problema ruma atu impede ita-nia osan labele mai tanba iha Orsamentu Jerál Estadu (OJE) 2020 ne’e, fulan ida liu ba ne’e ita  halo ona  levatamentu hodi halo transferénsia ka  lori  ona osan mai iha Timor-Leste,” Responsável ne’e afirma.

Nia esplika, akontese problema iha levantamentu bainhira PN la aprova OJE, maibé instituisaun independente hanesan BCTL halo levatamentu ba fundu petrolíferu

Maski, nia rekoñese  bazeia ba esperiénsia nasaun sira hanesan Iraun, Venezuela no seluk tan hetan blokeia konta bankária husi EUA, maibé ba Estadu Timor-Leste sei la akontese.

Nune’e, Governadór Banku husu ba públiku  labele dúvida kona-ba Estadu ninia kapasidade atu uza rekursu  fundu petrolíferu.

“Banku Sentrál hanesan Banku Governu Timor-Leste ne’ebé atu garante levantamentu ne’e la’o di’ak no sei laiha impedimentu. Ami kontinua servisu hodi apoiu Governu kontinua la’o nafatin ho di’ak,” nia akresenta

Entretantu, nia hatutan levatamentu hahú husi Governu dahuluk to’o VIII Governu Konstitusionál, halo ona tranférensia hamutuk billaun $12-resin hodi tama iha OJE kada tinan.

Jornalista: Florêncio Miranda Ximenes

Editora: Julia Chatarina