Governadór BCTL, Abraão de Vasconselhos. Imajen Tatoli/António Gonçalves

DILI, 23 setembru 2020 (TATOLI) – Governadór Banco Central Timor-Leste (BCTL), Abrãao de Vasconselhos, klarifika Banku Sentrál to’o oras ne’e laiha informasaun ruma kona-ba konjelamentu fundu, ne’ebé labele halo transferénsia osan hosi Banku Federál Estadu Unidu Amérika (EUA).

“Maibé karik akontese duni, Banku Sentrál de’it maka hatene, tanba konta ne’e ein nome BCTL, tanba ne’e ami de’it maka bele pronúnsia katak ita iha problema ka lae? enkuantu seidauk ko’alia buat ida entaun laiha problema”, tenik Governadór ba Agência Tatoli, kuarta ne’e, iha resintu Parlamentu Nasionál (PN).

Tuir Governadór, bainhira osan cash hosi fundu petrolíferu laiha ona maka Banku Sentrál normalmente foti osan iha Banku Federál EUA maibé la presiza prosedimentu barak.

“Atu foti osan iha Banku Federal, normalmente ami halo penarikan osan iha konta, hanesan bainhira ita presiza osan, ita ba banku ne’ebé ita tau osan no bele halo penarikan. Ninia diferente maka Banku Sentrál halo penarikan iha Amérika, hafoin maka tula hosi ne’ebá mak mai de’it, maibé la persiza prosedimentu barak, envolve maka Banku Sentrál, empreza, seguransa no aviaun hafoin tula mai. Foin lalais tula ona mai no sei mai tan,” nia dehan.

Dirijente Banku Sentrál ne’e esplika, iha prosedimentu nórmál, bainhira PN aprova Orsamentu Jerál Estadu (OJE) no haruka ba Prezidente Repúblika hodi promulga, maka Governu liuhosi Ministériu Finansa (MF) sei halo planu bainhira maka atu halo levantamentu no sei  fó informasaun ba BCTL katak atu halo levantamentu.

“Bazeia ba informasaun ne’e, norlamente Ministru Finansa no Diretór Tezouru maka asina pedidu levantamentu hodi haruka ba Banku Sentrál no prosesa, ita-nia osan fundu petróliferu  ninia cash ne’e iha no sufisiente ka lae atu halo transferénsia tuir pedidu ne’e, kuandu osan ne’e to’o maka BCTL diretamente halo transferénsia fundu ba iha konta Governu iha Banku Sentral,” Abrãao akresenta.

Bainhira osan iha cash fundu la to’o maka foin ba asaun sira ne’e atu junta osan hamutuk tuir pedidu Governu maka foin transfere.

Maski nune’e, nia dehan situasaun konjelamentu fundu petrolíferu bele akontese iha futuru tanba iha esperiénsia nasaun seluk hanesan nasaun Kuba, Venezuela, Iran, maibé bele akontese liuhosi prosesu naruk ida.

“La’ós derepente de’it akontese, tanba ne’e maka ita iha tempu sufisiente atu organiza ita-nia an saida maka ita tenke halo, konserteza atu akontese Banku Sentrál informa ba Governu liuhosi Ministériu Finansa no Parlamentu Nasionál,” nia realsa.

Governadór ne’e adianta, BCTL halo ona observasaun hodi entende loloos kona-ba informasaun Banku Federál labele halo transferénsia.

“Ami konfunde oituan tanba kestaun transferénsia fundu petrolíferu ba konta Governu ninian klaru hela. Tanba dezde inísiu hanesan parte hosi polítika Estadu no Governu deside konta ne’e iha de’it BCTL, laiha konta iha instituisaun ka banku komersiál sira seluk,” nia haktuir.

Abrãao hatutan: “Konta ka osan sira ne’ebé ita tau ba Banku Federál, la’ós konta Governu nein Estadu Timor-Leste nian maibé BCTL ninia konta no osan iha konta ne’ebá maka osan fundu petrolíferu ninian,”

Nia fó hanoin, karik iha dezenvolvimentu ruma kona-ba informasaun konjelametu fundu maka Primeiru-Ministru, Ministru Finansa, Vise-Ministra Finansa, inklui deputadu sira liuliu iha Komisaun C ba asuntu finansa públika maka sei hatene uluk.

“Informasaun sira hanesan ne’e Banku Sentrál dezkoñese oinsá maka bele iha fali informasaun ida dehan Timor-Leste labele utiliza ita-nia fundu. Timor-Leste sistema mak transparente liu, ema hotu bele hatene osan fundu ne’e ninia konta númeru hira? rai iha ne’ebé?,” nia dehan tan.

Konta iha Banku Federál  ninia balansu la boot ida tanba osan ne’ebé investe hotu ona iha títulu no daudaun balansu ne’ebé Banku Sentrál rejista iha Banku Federál maka biliaun $18-resin

Jornalista: Antónia Gusmão

Editora: Julia Chatarina   

HAKEREK NO HATÁN

Please enter your comment!
Please enter your name here