Parteira. Ilustrasaun

DILI,13 novembru 2020 (TATOLI)—Asosiasaun Parteira Timor-Leste (APTL) husu ba Ministériu Saúde atu kria alojamentu ba parteira sira  liliu sira ne’ebe maka servisu iha área remotas atu atende atende inan isin rua ho lalais ba kombate kazu mortalidade inan ho oan.

Prezidente APTL, Natalia de Araújo, informa durante ne’e parteira sira seidauk iha alojamentu atu hela liliu sira  ne’ebé  maka destaka iha Postu Saúde, Sentru Saúde.

Notísia Relevante :APTL Komemora Konsulta Populár Ho Marsa Saudável No Promove Susubeen Inan Nian

“Sebele karik halo alojamentu ida integradu ba parteira no ba médiku no mós enfermeiru, tanba parteira hanesan profisionál ne’ebé maka importante tebtebes atu hetan alojamentu iha fasilidade Saúde sira,” dehan nia ba jornalista sira iha Manleuana Dili, sesta ne’e.

Durante ne’e, nia esplika parteira sira laiha alojamentu ne’ebé maka adekuadu no kompleta ho fasilidades sira.

“Ami mós iha espetativa katak Ministeriu Saúde bele tau iha prioridade tanba ita hatene katak esperansa ba moris ba inan ida ne’ebé mak ho hemorazia durante periodu partu nia iha esperansa ba moris ne’e oras rua de’it, atu antesipa ida ne’e fatin ne’ebé di’ak liu mak parteira ho fasilidade saúde ne’e hamutuk de’it liuliu iha área remota sira, hodi hamenus kazu mortalidade inan ho oan,” nia hateten.

Postu Saúde barak maka to’o ohin loron Ministériu Saúde seidauk harii alojamentu ba parteira sira, bee moos, transporte no seluk tan.

Jornalista : Felicidade Ximenes

Editór:Agapito dos Santos

HAKEREK NO HATÁN

Please enter your comment!
Please enter your name here