Pesoál saúde-sira iha munisípiu Dili, tama-sai bairru hodi halo vasinasaun ba labarik-sira. Imajen Tatoli/António Gonçalves.

DILI, 14 novembru 2020 (TATOLI)—Asosiasaun Parteira Timor-Leste (APTL), sesta (13/11) halo promosaun saúde ba inan pos partu uma-kain sanulu iha Aldeia Laulora Suku Manleuana Munisípiu Dili iha ámbitu komemorasaun aniversáriu ba dala 20.


Prezidente Asosiasaun Parteira Timor-Leste, Natalia de Araújo, hateten APTL hari’i iha loron 20 fulan-novembru tinan 2000, hanesan mahon hodi halibur Parteira sira hotu iha Timor-Leste.

Nia hatutan Parteira ne’e hanesan belun ba feto no mós komunidade hotu tanba sira sempre halo vizita ba uma sira hodi hare’e inan sira no oinsá inan ne’e eduka no kuidadu nia oan sira.

Problema mánutrisaun sai asuntu importante atu kombate iha Timor-Leste, tanba ne’e parteira sira nafatin promosaun saúde nune’e bele hasa’e nutrisaun ba inan no oan hodi prevene kazu mortalidade inan no oan.

“Parteira sira presiza esplika hahán ne’ebé maka saudavel ba ita-nia inan feton sira atu nune’e sira bele komprende no bele implementa atu prepara hahán ne’ebé iha nutrisaun ba sira-nia oan,”nia hateten ba jornalista sira iha Manleuana, sesta (13/11).

Parteira sira mós halo liña koordenasaun ho lideransa komunitária atu hakbesik saúde ba komunidade liuhosi programa saúde iha família no seluk tan.

APTL daudaun ne’e iha ona membru hamutuk 805. “Progresu ne’ebé maka APTL atinje ne’e agora membru no estrutura ami nian to ona Munisípiu 12 inklui RAEOA ba to’o Postu Adminitrativu no mós to’o ba Suku sira,” tenik tan.

”Ami hanesan liman no ain ba Ministeriu Saúde nian hodi hare’e kona-ba kompetensia saida maka parteira sira presiza liuhosi abilidade no prátika , nune’e mós ho atetude parteira sira nian, hodi halo sira-nia servisu no serbí Nasaun ida ne’e liliu ba Inan no Oan sira hotu,” nia esplika.

Jornalista : Felicidade Ximenes

Editór : Agapito dos Santos

HAKEREK NO HATÁN

Please enter your comment!
Please enter your name here